O‘zbekistonda oktyabr oyida ob-havo qanday bo‘ladi? “O‘zgidromet” ma’lumot berdi
O‘zgidromet oktyabr oyida havo harorati o‘zgarib turishi, ayrim hududlarda yog‘ingarchilik me’yordan ko‘p bo‘lishini ma’lum qildi.
O‘zbekistonda oktyabr oyida havo harorati o‘zgaruvchan bo‘lishi kutilmoqda. Oyning ayrim kunlarida iliq ob-havo kuzatilsa, vaqti-vaqti bilan sovuq va nam havo oqimlari kirib kelishi mumkin. Bu haqda "O‘zgidromet" ma’lumot berdi.
Odatdoktyabrdada o‘rtacha oylik havo harorati sentyabrga nisbatan 6–7 darajaga, respublikaning shimoliy hududlarida esa 8–9 darajaga past bo‘ladi. Kechalari havo harorati 12–17 daraja iliqdan 2–7 daraja iliqqacha, kunduz kunlari esa 23–28 daraja iliqdan 10–15 daraja iliqqacha o‘zgaradi. Oktyabr oyining ikkinchi yarmida, shimoliy hududlarda esa ertaroq dastlabki kuzgi sovuqlar kuzatilishi mumkin.
“O‘zgidromet” prognoziga ko‘ra, oktabr oyi beqaror ob-havo bilan boshlanadi. 1-oktabr kuni markaziy va sharqiy viloyatlarda nam va nisbatan salqin havo oqimining ta’siri davom etadi. Ayrim joylarda yomg‘ir yog‘ishi, tog‘oldi va tog‘li hududlarda esa yog‘ingarchilik kuchliroq bo‘lishi mumkin. Baland tog‘larda yomg‘ir qorga aylanishi ehtimoli bor.
2–4-oktyabr kunlari respublikaning katta qismida yog‘ingarchilik kutilmaydi va havo harorati ko‘tarila boshlaydi.4-oktyabrdan shimoli-g‘arbiy hududlarga yangi sovuq va nam havo oqimi kirib kelishi, 5–7-oktyabr kunlari esa uning respublikaning boshqa hududlariga tarqalishi kutilmoqda.
Oyning qolgan qismida ham havo haroratining o‘zgarib turishi prognoz qilinmoqda. Iliq kunlarda kechasi havo 10–13 daraja, kunduzi 25–28 darajagacha isishi mumkin. Sovuq havo oqimlari kirib kelganda esa kechasi 3–8 daraja, kunduzi 15–20 darajagacha pasayadi. Shimoliy hududlarda bunday davrlarda kechasi 0–2 daraja sovuq, kunduzi 10–15 daraja iliq bo‘lishi mumkin.
“O‘zgidromet” oktyabr oyining o‘rtacha harorat foni iqlimiy me’yor atrofida, ayrim hududlarda esa undan yuqori bo‘lishini kutmoqda. Yog‘ingarchilik hududlar bo‘yicha notekis taqsimlanishi mumkin. Shimolda yog‘ingarchilik miqdori me’yordan kam, markaziy va janubi-sharqiy hududlarda esa me’yor atrofida bo‘lishi prognoz qilinmoqda.
Toshkent, Samarqand, Jizzax, Sirdaryo, Qashqadaryo va Surxondaryo viloyatlarida, shuningdek, Farg‘ona vodiysining ayrim tumanlarida yog‘ingarchilik miqdori iqlimiy me’yordan ko‘p bo‘lishi ehtimoli bor.
