Qozog‘istonda harbiylar o‘limi: 13 ta jinoyat ishi qo‘zg‘atildi
14 nafar harbiy halok bo‘lgan Kaspiy dengizidagi mashg‘ulotlarni rejalashtirishda qoidabuzarliklarga yo‘l qo‘yilgani aniqlandi.
Qozog‘iston Mudofaa vazirligidagi kompleks tekshiruvning dastlabki bosqichi yakunlari bo‘yicha 13 ta jinoyat ishi qo‘zg‘atildi. Tekshiruv Kaspiy dengizidagi harbiy mashg‘ulotlar vaqtida 14 nafar harbiy xizmatchi halok bo‘lganidan keyin boshlangan.
5-oktyabr kuni Qozog‘iston Prezidenti Qasim-Jomart Toqayev Mudofaa vazirligidagi holatni kompleks tekshirish bo‘yicha komissiya a’zolari bilan yig‘ilish o‘tkazdi. Unda tekshiruvning dastlabki natijalari taqdim etildi.
Ma’lum qilinishicha, tekshiruv harbiy tadbirlarni rejalashtirishda jiddiy xatolarga yo‘l qo‘yilgani va avvalgi rahbariyat tomonidan yetarli nazorat o‘rnatilmaganini ko‘rsatgan. Kaspiy dengizidagi fojia yuzasidan o‘tkazilgan tekshiruvda mashg‘ulotlarni tayyorlash va rejalashtirish, xavflarni baholash, desant tushirishni tashkil etish hamda harbiy xizmatchilar xavfsizligini ta’minlashda jiddiy kamchiliklar aniqlangan. Tekshiruvning birinchi bosqichi yakunlariga ko‘ra, Mudofaa vazirligining tashkilot va bo‘linmalarida davlat mulkini ehtimoliy talon-toroj qilish, mansab vakolatlarini suiiste’mol qilish va boshqa qonunbuzarliklar yuzasidan 13 ta jinoyat ishi qo‘zg‘atilgan.
Shuningdek, qo‘mondonlik tarkibining ehtimoliy jinoiy sovuqqonligi holatlari bo‘yicha sudgacha tergov davom etmoqda. Ushbu ish doirasida 5 nafar mansabdor shaxs hibsga olingan. Toqayev harbiy xizmatchilarning o‘limiga sabab bo‘lgan holatlar uchun aybdor mansabdor shaxslar qonun doirasida javobgarlikka tortilishi kerakligini ta’kidlab, masalani shaxsiy nazoratiga olgan.
Bundan tashqari, Qozog‘iston Oliy auditorlik palatasi Mudofaa vazirligiga qarashli 50 ta obyekt, jumladan, 48 ta harbiy qismda tekshiruv olib bormoqda. Audit doirasida Qurolli kuchlar faoliyatining asosiy yo‘nalishlaridagi holat baholanadi.
Fojia 24-sentabr kuni Mang‘istau viloyatida Qozog‘iston Harbiy-dengiz kuchlarining o‘quv mashg‘ulotlari vaqtida yuz bergan. Noqulay ob-havo va kuchli shamol 17 nafar harbiy xizmatchining Kaspiy dengiziga oqib ketishiga sabab bo'lgan. Ulardan uch nafari qutqarilgan, 14 nafari halok bo‘lgan.
Komissiya tekshiruvi davom etmoqda. Aniqlangan kamchiliklarni bartaraf etish bo‘yicha yangi takliflar ishlab chiqilishi va tekshiruv natijalari Qurolli kuchlarni isloh qilish rejasida inobatga olinishi belgilangan.
