Yaponiyalik muxlislar o‘zbek sportchilariga omad tilashdi
Bugun Maydzuru shahrida tayyorgarlikdan o‘tayotgan dzyudochilarimiz ishtirokida tadbir bo‘lib o‘tdi.
Dastavval yig‘ilganlar terma jamoamizning ochiq mashg‘ulotiga guvoh bo‘lishdi. Tadbirda o‘zbek milliy kiyimlari va urf-odatlariga oid ko‘rgazma ham tashkil etildi. Eʼtiborlisi, yaponiyalik yosh muxlislar terma jamoamizni qo‘llab-quvvatlovchi ko‘rgazmali qurollardan foydalanishdi. Bu esa sportchilarimizni xushnud qildi.
Tadbir Maydzuru shahri meriyasi va O‘zbekiston dzyudo federatsiyasi o‘rtasida tuzilgan hamkorlik memorandumi doirasida tashkil etildi.
Unda Milliy Olimpiya Qo‘mitasi raisi o‘rinbosari, mamlakat dzyudo federatsiyasi raisi Azizjon Kamilov, Maydzuru shahri hokimiyati mutasaddilari, O‘zbekistonning Yaponiyadagi elchixonasi masʼul xodimi Muzaffar Jalilov va mahalliy aholi vakillari ishtirok etdi.
Tadbirda Azizjon Kamilov shahar meriga federatsiyaning tashakkurnomasini topshirdi.
Eslatib o‘tamiz, sportchilarimiz 12 iyun kuni Tokioning Maydzuru shahriga Olimpiadaga tayyorgarlik bosqichidan o‘rin olgan so‘nggi o‘quv mashg‘ulotlarini o‘tkazish uchun jo‘nab ketishgan edi.
