Afg‘onistondagi voqealarda Pokistonni ayblash adolatsizlik – Imron Xon
Toliblarni muzokaralar stoliga jalb qilishda hech kim Pokiston kabi katta rol o‘ynamagan. Bu haqda Toshkentda davom etayotgan xalqaro konferensiyada Pokiston bosh vaziri Imron Xon aytib o‘tdi.
«Pokiston toliblarni muzokaralarni boshlash va afg‘on muammosiga tinch yechim topishga ko‘ndirish uchun barcha vositalarni ishga soldi. Afg‘onistonda bo‘layotgan voqealarda Pokistonni ayblash juda ham adolatsizlik bo‘ladi. Bizning ustuvor [maqsadimiz] Afg‘onistonda tinchlikni taʼminlashdir, chunki bu to‘g‘ridan to‘g‘ri Pokistonga taʼsir qiladi», degan Pokiston bosh vaziri.
Shuningdek, Imron Xon Afg‘onistonning barcha qo‘shnilari, mintaqaviy va xalqaro “o‘yinchilar”ni afg‘on muammosi yuzasidan siyosiy kelishuvga erishish uchun birgalikda harakat qilishga chaqirdi.
Pokiston yetakchisi Afg‘oniston prezidenti Ashraf G‘anining Pokistonning muammodagi salbiy rolini eslatgani haqida ham gapirdi.
«[Undan ko‘ra], prezident G‘ani Afg‘onistondagi mojarodan eng ko‘p jabr ko‘rgan mamlakat – Pokiston haqida gapirsin. So‘nggi 15 yilda Pokistonda 70 ming kishi halok bo‘ldi. Pokiston yangi yangi mojarolarni xohlamaydi. Iqtisodiyotimiz endi og‘ir davrdan chiqib kelmoqda. Men uchun Afg‘onistondagi voqealarda Pokiston ayblanishini eshitish juda og‘ir», dedi Imron Xon.
Bundan tashqari, Imron Xon AQSH ham muammoga harbiy yo‘l bilan yechim topishga uringani, toliblar muzokaralar stoliga o‘tirishni so‘ragan vaqtda mamlakatga NATOning 150 ming askari kirib kelganini eslatdi.
«Agar AQSH qo‘shinlarining chiqib ketish sanasi aniq bo‘lib turgan bo‘lsa, nega toliblar biz bilan kelishuvga kelishi kerak», deya qo‘shimcha qilgan u.
