Abdulaziz Komilov din erkinliklari masalasiga bag‘ishlangan xalqaro sammitda ishtirok etdi
O‘zbekiston tashqi ishlar vaziri Abdulaziz Komilov Vashingtonda tashkil etilgan Din masalalari bo‘yicha xalqaro sammitda videomurojaat shaklida ishtirok etdi.
O‘zbekistonning AQSHdagi elchixonasi xabariga ko‘ra, sammitda shuningdek AQSH prezidentni maʼmuriyati vakillari, senator va kongressmenlar, turli mamlakatlar vakillari, xalqaro tashkilotlar rahbarlari va boshqa oliy martabali mehmonlar ishtirok etishdi.
Sammit ishtirokchilariga O‘zbekistonda vijdon erkinligi masalasida olib borilayotgan ishlar, diniy tashkilotlar faoliyatiga oid qonunlarning yana-da liberallashganligi haqida maʼlumot berildi.
Sammitda ishtirok etgan Oq uy vakili M.Rojers so‘nggi yillarda O‘zbekistonda sohada amalga oshirilgan ijobiy o‘zgarishlarni eʼtirof etdi, jumladan, diniy motivlar asosida ozodlikdan mahrum qilingan mahbuslarning ozodlikka chiqarilishi, qonunlarning qayta ko‘rib chiqilishi kabi ishlar qayd etildi. AQSH davlat kotibi E.Bliken ham O‘zbekistonda diniy erkinliklar masalasida jiddiy o‘zganishlar amalga oshirilayotganiga eʼtibor qaratdi. AQSH xalqaro diniy erkinlik komissiyasi raisi N.Mayenza O‘zbekiston barcha uchun eʼtiqod erkinligini taʼminlayotgan davlatning yaqqol namunasi deya aytib o‘tdi.
