“U sportni jonidan ortiq sevardi” - marhum Murod Xonto‘ayev haqida hamkasblari
Osiyo ayig‘i nomi bilan tanilgan O‘zbekistonlik MMA jangchisi, O‘zbekiston MMA assotsiatsiyasi vitse-prezidenti Murod Xonto‘rayev 34 yoshida dunyoni tark etdi.
Murod Xonto‘rayev 1987 yilda Toshkent shahrida tug‘ilgan. O‘zining professional karyerasini 2013 yilda boshlagan.
MMA sport bo‘yicha dunyo eʼtiboriga tushgan va yuqori natijani qayd etgan hamyurtimiz O‘zbekiston aralash jang sanʼatlari assotsiatsiyasi raisi o‘rinbosari lavozimida faoliyat yuritib kelayotgan edi. Bugungi kunda marhum sportchimiz tashabbusi bilan viloyatlarda turli musobaqalar muntazam ravishda o‘tkazilib, yangi sport zallari va maydonlari o‘z faoliyatini boshladi. Endi ana shu faoliyatini boshlagan zallar va musobaqalardan yangi yulduzlar, yangi nomlar chiqadi.
O‘zbekiston aralash jang sanʼatlari assotsiatsiyasi ijrochi direktori Zafar Qahramonov:
- Sovuq xabar yashin tezligida tarqaldi. Bu xabarni eshitib, chin ko‘ngildan xafa bo‘ldik, kuyundik. Murod Xonto‘rayev insonlar ko‘nglidan mustahkam joy olgan, hurmat-eʼtiborga sazovor bo‘lgan inson edi. Kechayu kunduz o‘z ustida ishlab, har bir uyushtirayotgan tadbirga o‘ta puxta tayyorgarlik ko‘rar edi. U yosh sportchilarga haqiqiy namuna bo‘la oldi desam, adashmayman. MMA sportiga tekkan eng katta foydasi yigitlardan tartib-qoida qattiq talab qilardi. Tan olish kerak, MMA sportchilarning aksariyati to‘polonchi, urushqoq ko‘cha bolalaridan tashkil topgan. Shu sabab ular bilan tushunmovchilik bo‘lsa, biz darhol Murodga murojaat qilar edik. U esa yuzaga kelgan tushunmovchilikni ijobiy hal qilib berardi. Haqiqatni sevardi.
MMA sportini yana-da rivojlantirish yuzasidan kelgusida qanday rejalari bor edi?
24 avgust kuni katta musobaqa uyushtirish rejasi borligi haqida gapirgan edi. Tayyorgarlikni boshlab yuborgan edi. Uning maqsadi tarqoq sportchilarni birlashtirish edi. O‘zimizning ko‘p yigitlarimiz so‘nggi vaqtlarda Qirg‘iziston, Qozog‘istonga chiqib, janglarda qatnashayotgan edi. Murodning shu yigitlar boshqa davlatlarga borib jang qilgandan ko‘ra o‘zimizda ham shu janglar tashkillashtirilsa, havaskor sportchilarimiz esa shu yerda o‘z isteʼdodini namoyon qilishsa, degan maqsadi bor edi.
Ijtimoiy tarmoqlarda tarqalgan salbiy xabarlar munosabatingiz?
Men eshitganimga emas ko‘rganlarimga ishonaman. Boshqalarga ham shuni tavsiya etaman. Ijtimoiy tarmoqlarda turli noxush gaplar tarqalmoqda. Bu kabi asossiz xabarlar tarqalishidan kimga qanday manfaat beradi bilmayman, ammo shuni aniq ayta olamanki, Murod hech qachon spirtli ichimlik isteʼmol qilib yurgan odam emas. U iymonli, eʼtiqodli yigit edi. Tezlikni ham ijtimoiy tarmoqlarda aytilgandek darajada oshirmas edi.
Nabi Qodirov, qo‘l jang bo‘yicha terma jamoa bosh murabbiysi:
- Murod bizga shug‘ullanish, malaka oshirish uchun 2007 yil kelgan. Murabbiyimiz Asad O‘rinov va men Murodjon bilan birga juda yaxshi ishladik. Yaxshi sportchi edi. Qo‘l jangi bo‘yicha juda ko‘p musobaqalarda ishtirok etib, qisqa vaqt ichida yuqori natijalarga erishgandi. Yangi o‘sib kelayotgan sportchilarga dalda berib, doim maʼnaviy, qolaversa moddiy tomondan ham yordam berardi. Shogirdlari ham bor edi. Sport bilan bog‘liq rejalari ko‘p edi. ayniqsa avgust oyida aralash jang sanʼati bo‘yicha katta yirik musobaqa o‘tkazish maqsadi bor edi.
Aslida bu kabi musobaqalarni o‘tkazishning juda katta foydasi bor. Unda yigitlar malaka oshirish imkoniyatiga ega. O‘zingizga maʼlum, noolimpiya sport turlari bilan shug‘ullanayotgan sportchilarga maʼnaviy va moddiy eʼtibor berilmasa, janglar tashkillashtirilmasa sportchilarimiz bu sport turini tashlab ketishlari mumkin. Murod esa buning oldini olishga, katta tadbirlar o‘tkazishga harakat qilar edi.
Bugungi kunda Murod Xonto‘rayevning shogirdi deb kimni ayta olasiz?
- Jasur Anorbayev yaxshi o‘sib kelayotgan shogirdlaridan biri. Abbos Rasuljonov, Abzal Abdurahimov ham uning eng yaxshi shogirdlaridandir.
Mahmud Murodov, o‘zbek aralash janglar sportchisi:
- Murod O‘zbekiston xalqi uchun juda katta ishlar qildi. MMA rivojlanishi uchun bor kuch- g‘ayratini ayamadi. U doimiy ravishda yetimxonalar, maktablar, maktabgacha taʼlim muassasalarga yordam qo‘lini cho‘zgan. Hattoki, juda ko‘p oilalarga yordam berganiga o‘zim guvoh bo‘lganman Murod bu ishlarni kimgadir ko‘rsatish, maqtanish uchun emas, balki chin ko‘ngildan qilar edi. Men juda ko‘p marotaba mehmoni bo‘lganman. Oilasidagilar ham yaxshi insonlar. Bizning o‘zaro kelishilgan holda turnirlar o‘tkazish rejamiz bor edi.
Avtohalokat ro‘y berishidan bir necha kun avval men bilan gaplashganida qurbon hayit arafasida ko‘pchilik muhtoj oilalarga yordam berish maqsadi borligini aytgan edi. Afsuski, niyati amalga oshmadi. Bu hayot ekan, taqdirdan qocholmaymiz, peshonaga yozilgani bo‘ladi. Bu juda yaxshi inson, do‘st, hamkasb edi. Sportni jonidan ortiq yaxshi ko‘rardi.
Munojat Valiyeva suhbatlashdi.
