Tokio-2020. Ochilish marosimi oldidan O‘zbekiston bayroqdorlari o‘zgardi
Bugun, 23 iyul kuni Tokio-2020 Olimpiadasining ochilish marosimi bo‘lib o‘tadi. Tadbir oldidan O‘zbekiston delegatsiyasi bayroqdorlari kutilmaganda o‘zgargani maʼlum bo‘ldi.
Tokioda bo‘lib turgan O‘zbekiston milliy olimpiya qo‘mitasi bosh kotibi Oybek Qosimov «O‘zbekiston 24» telekanali muxbiri bilan suhbatda bayroqdorlar o‘zgargani haqida gapirgan.
«O‘zbekiston bayroqdorini tayinlashda avvalambor musobaqalar jadvalini hisobga olgan holda, qolaversa barcha sportchi, delegatsiya aʼzolarining fikrini inobatga olib boks bo‘yicha O‘zbekiston milliy jamoasi aʼzosi Bahodir Jalolov va taekvondo bo‘yicha jamoamiz aʼzosi Nigora Tursunqulovaga ishonch bildirildi», - deydi MOQ bosh kotibi Oybek Qosimov.
Ochilish marosimida sportchilar chiqishini Olimpiada vatani Gretsiya delegatsiyasi boshlab bersa, Yaponiya mezbon sifatida yakunlaydi.
Qayd etish joiz, O‘zbekiston yapon alifbosida tartib raqami bo‘yicha 25-o‘rindan joy olgani sababli, bu safargi marosimda avvalgilaridan oldinroq chiqadi.
Maʼlumot uchun, Toshkent vaqti bilan soat 16:00da boshlanadigan ochilish marosimi axborot hamkorimiz «Sport TV» orqali jonli efirda namoyish etiladi.
