Temur Ismoilov butun umrga tennisdan chetlatildi
O‘zbekistonlik tennischilar Temur Ismoilov va Amal Sultonbekov kelishilgan o‘yinlarda ishtirok etgani sabab jazolandi. Bu haqda Tennisda halollikni taʼminlash xalqaro agentligi (ITIA) xabar berdi.
Ushbu qaror xalqaro agentlik 2019 yildagi kelishilgan o‘yinlar bo‘yicha tekshiruv o‘tkazganidan so‘ng qabul qilingan.
Dastlabki tekshiruvlardan so‘ng Temur Ismoilov 7 yillik diskvalifikatsiyaga uchragani maʼlum qilingandi. Navbatdagi tekshiruvlardan keyin uni butun umrga tennisdan chetlatish borasida qarorga kelingan. Xalqaro agentlik qo‘ygan taqiq 2021 yil 21 iyuldan kuchga kirgan. Shuningdek, Temur Ismoilov 14 ming dollar miqdorida jarima ham to‘lashi lozim. Amal Sultonbekov esa 5 yilga tennis bahslaridan chetlatilgan va 8 ming dollar miqdoridagi jarimaga tortilgan.
Qayd etish joiz, Professional tennischilar assotsiatsiyasi (ATP) reytingida Ismoilov 397-o‘rinni, Sultonbekov esa 1886-o‘rinni band etib turgandi.
