Akbar Jo‘rayev Tokio—2020 Olimpiadasi oltin medalini qo‘lga kiritdi
Tokio—2020 Olimpiadasida -109 kg vazn toifasi vakillari o‘rtasida musobaqalar 3 avgust kuni bo‘lib o‘tdi.
O‘zbekistonlik sportchi Akbar Jo‘rayev dast ko‘tarishda 193 kg vaznni bo‘ysundirdi va Olimpiya o‘yinlari rekordini takrorladi. Biroq oradan ko‘p o‘tmay Armaniston vakili Simon Martirosyan 195 kg toshni ko‘tarib, rekordni yangiladi. Shu tariqa dast ko‘tarishda Jo‘rayev ikkinchi o‘rinni oldi.
Siltab ko‘tarishda 237 kilogrammni ko‘targan Akbar umumiy 430 kg vaznni bo‘ysundirdi. Bu bilan Jo‘rayev birinchi natijani qayd etib, oltin medalga sazovor bo‘ldi.
Shu tariqa O‘zbekiston delegatsiyasining medallari soni uchtaga yetdi. Avvalroq taekvondochi Ulug‘bek Rashidov oltin medalga ega chiqqan, dzyudochi Davlat Bobonov esa bronzani qo‘lga kiritgandi.
