Tokio-2020. 12- kunda sportchilarimizning qayd etayotgan natijalari
Tokio-2020 Olimpiya o‘yinlari doirasida G‘ulomjon Abdullayev (-57 kg) erkin kurashchilarimizning ilk g‘alabasiga mualliflik qildi.
Vakilimiz dastlabki davrada xitoylik polvonni mag‘lub etdi.
Mingxu Liuga qarshi kechgan qiziqarli kurashda Abdullayev g‘alabani o‘z foydasiga hal qildi va chorak finalga yo‘l oldi. Hamyurtimiz yarim final yo‘llanmasi uchun AQSH va Rossiya Olimpiya qo‘mitasi vakili o‘rtasidagi bahs g‘olibiga qarshi kurashadi.
Bugun yana bir erkin kurashchimiz Jabrail Shapiyev ham Olimpiyadada ilk bellashuvini o‘tkazdi. Bahsda sportchimiz eronlik Hassan Yazdanicharatiga qarshi kurashdi va mag‘lubiyatga uchradi. Endi eronlik sportchi finalga chiqsa, Shapiyev bronza medali uchun kurashishi mumkin. Bugun kanoechilarimiz ham erta tongdan bahslarga kirishdi. Nilufar Zokirova nimchorak final bellashuvida 200 metr masofaga o‘tkazilgan musobaqada 49.686 soniya natija qayd etib o‘z guruhida 6-o‘rinni egalladi. Hozirgina nihoyasiga yetgan chorak final bahsida esa Zokirova yana 6-o‘rinni qo‘lga kiritdi va turnirdagi o‘z ishtirokini yakunladi. Yana bir kanoechimiz Dilnoza Rahmatova dastlabki chiqishida 200 metrga kechgan saralash bosqichida 47.716 soniya natija bilan 5-o‘rinni egallab chorak finalga chiqqandi. Bu bosqichda esa Rahmatova 3-o‘rinni egalladi. Sportchilarimizdan yengil atletikachimiz Yekatirina Voronina 100 metrga to‘siqlar osha yugurish bahslarida 14.19 natija qayd etdi va o‘z shaxsiy rekordini yangiladi. O‘nkurashda qatnashayotgan 24 nafar sportchi ichida bu 23-natija hisoblanadi, 24-o‘rinni esa marraga yetib kela olmagan kubalik sportchi band etdi. Birozdan so‘ng Yekatirina balandlikka sakrash bahslarida ishtirok etadi.
Eslatib o‘tamiz, bugun yana boks bellashuvlarida Bahodir Jalolov ham yarim final bahslarida o‘z chiqishini boshlaydi.
