Ijtimoiy sahifasida Afg‘onistonda qolib ketganini aytgan britaniyalik talabaning akkaunti bloklandi
Britaniyalik talaba Maylz Rautledj yozgi taʼtilda “dunyodagi eng yomon joylardan biri”ni borib ko‘rishni rejalashtirgan edi.
U Afg‘onistonni “Tolibon” egallayotganini bilsa-da, prezident Ashraf G‘ani hukumati bunchalik tez taslim bo‘lishini kutmagan edi.
Maylz toliblar tomonidan o‘g‘irlanishi mumkinligini bilib, har ehtimolga qarshi Lord mavqeiga mansubligi to‘g‘risida sertifikat sotib olgan va kredit karta rasmiylashtirgan. U 13 avgust kuni Kobulga yetib keldi. Noxush voqea sodir bo‘lgan taqdirda toliblarga o‘lpon taklif qilishni rejalashtirgan.
Soxta lord Rautledj ijtimoiy tarmoqlarda o‘z taassurotlari bilan bo‘lishishni boshladi. U safarga chiqishdan oldin o‘z tanlovini quyidagicha izohlagan:
Men plyajda yotishni yomon ko‘raman. Shuning uchun noodatiy ish qildim. Men Afg‘oniston juda go‘zal va buning ustiga, arzon degan qarorga keldim. Bu yerda rostdan ham hamma narsa arzon. To‘yimli tushlik bir dollarga ham yetmaydi
Antiqa sayohatchi boshqalarni ham Kobulga taklif qilgan. Ammo vaziyat og‘irlashganda “lord” ham xavotirlana boshladi.
“Mahalliy harbiylar bilan uchrashdim, yaxshi odamlar ekan. Reyslar bekor qilingan, ammo o‘ylashimcha evakuatsiya qilish mumkin bo‘ladi”, —deb yozgan u.
Britaniyalik "antiqa" sayyohatchi qo‘rqqanidan milliy libos sotib olib, xavf tug‘ilganda o‘zini afg‘onistonlik deb tanishtirishni rejalashtirdi.
U yordam so‘rab Britaniya elchixonasiga borganida, elchixona yopilib bo‘lgan edi. Aeroportda esa poytaxt to‘liq toliblar nazoratiga o‘tgani va mamlakatdan chiqib ketishning hech qanday imkoni qolmaganini bildi.
Hozir u ijtimoiy sahifasini BMT ijaraga olgan binolardan birida turib yuritmoqda.
“Balki meni ertaga evakuatsiya qilishar, balki bir oydan keyin. Ammo nima bo‘lgan taqdirda ham bu universitet yotoqxonasidan yaxshiroq”, — degan u o‘zining blogida.
Maylzning postlari internetda qizg‘in muhokamalarga sabab bo‘lmoqda. Ayrimlar uning hikoyalari rostligiga ishonmasa, boshqalar buni ruhiy kasallikka yo‘yishmoqda.
Soxta lordning so‘nggi posti kecha, 16 avgust kuni eʼlon qilingan.
“Menga himoya vositasi beriladi, evakuatsiya qilishadi va xavfsiz joyga olib ketishadi. Men eng yaxshilar bilan birgaman”, —deb yozgan u.
Shundan so‘ng uning akkaunti yopilgan.
Sharofat Mahmudova
