Bir soatdan kam davom etgan bo‘ron shaharchani vayron qildi: uch kishi halok bo‘ldi
Ma’lum qilinishicha, 8 mingga yaqin uy qisman yoki to‘liq vayron bo‘lgan.

Braziliyaning Riu-Grandi-du-Sul shtatidagi Tupansireta shahrida kuchli bo‘ron yuz berdi. Tabiiy ofat oqibatida uch kishi halok bo‘ldi, minglab turar joylar va shahar infratuzilmasiga zarar yetdi.
Ma'lum qilinishicha, shahar hokimi Gustavo Terra 8,6 mingta turar joydan qariyb 8 ming tasi qisman yoki to‘liq vayron bo‘lganini ma’lum qilgan. Uning ta’kidlashicha, bo‘ron savdo obyektlari, sanoat korxonalari, qishloq xo‘jaligi inshootlari va don omborlariga ham katta zarar yetkazgan.
Tabiiy ofat 20-noyabr kuni yuz bergan va bir soatdan kam davom etgan. Milliy meteorologiya instituti ma’lumotlariga ko‘ra, shaharda shamol tezligi soatiga 114 kilometrga yetgan. Kuchli shamol qariyb 100 ta daraxtni qulatib, yo‘llarni to‘sib qo‘ygan, aholini elektr energiyasi va suvsiz qoldirgan.
Mahalliy shifoxonaning tomi uchib ketgani sababli 11 nafar bemor evakuatsiya qilingan. Bo‘ron shtatdagi yana 32 ta munitsipalitetga ham ta’sir ko‘rsatgan.
Meteorologlar hodisani kuchli momaqaldiroq tizimi — superhujayra bilan izohlagan. Braziliya prezidenti Luis Inasiu Lula da Silva zarar ko‘rgan hududlarga favqulodda xizmatlarni yuborishni buyurgan. Mintaqaviy hokimiyat esa oqibatlarni bartaraf etish uchun qariyb 330 ming dollar ajratgan.
Ayni paytda qutqaruvchilar vayronalarni tozalash va ehtimoliy jabrlanganlarni qidirish ishlarini davom ettirmoqda.








