Kurashchilarimiz bugun jahon chempionatida maydonga tushadi
Rossiyaning Ufa shahrida erkin, yunon-rum va ayollar kurashi bo‘yicha yoshlar o‘rtasida jahon chempionati bo‘lib o‘tmoqda.
Yigirma bir yoshgacha bo‘lgan kurashchilar o‘rtasida o‘tkazilayotgan dunyo birinchiligida sayyoramizning 53 davlatidan 500 nafardan ziyod sportchi ishtirok etmoqda. Ular orasida O‘zbekiston erkin va yunon-rum kurash terma jamoasi azolari ham bor.
Bugun o‘smirlar va yoshlar o‘rtasida jahon chempioni, 2018-yil Argentinada o‘tgan uchinchi o‘smirlar Olimpiadasi g‘olibi, «Sport Oskari» mukofoti sohibi Umidjon Jalolov (61 kg) hamda o‘smirlar Olimpiadasining bronza medali sohibi Muhammadrasul Rahimov (92 kg) maydonga tushadi.
Qurʼa natijasiga ko‘ra, 19 yoshli Umidjon Jalolov chiqishlarini to‘g‘ridan-to‘g‘ri 1/8 finaldan boshlaydi. Uning raqibi qozog‘istonlik Salamat Malikov hamda ozarbayjonlik Abdulfaz Nasirov o‘rtasidagi bellashuvdan so‘ng maʼlum bo‘ladi. 20 yoshli Muhammadrasul Rahimov esa 1/8 finalda AQSH kurashchisi, 19 yoshli Rokki Jozef Elamga qarshi bahs olib boradi.
Jamshid Amirov
