UFC‘da ishtirok etadigan O‘zbekiston vakillari soni 4 nafarga yetadi
O‘zbekistonlik yakkakurashchi Saidyoqub Qahramonov (8-2) O‘zbekiston vaqti bilan 22 avgust tongida UFC promoushenida debyut qiladi.
Yengil (-61 kg) vazn toifasida harakat qiluvchi Qahramonovning maʼlum qilishicha, sportchi UFC bilan to‘rtta jangga shartnoma imzolagan. U 18 avgust kuni Toshkentdan AQSHga uchib ketadi.
Qahramonov 21 avgust kuni (Toshkent vaqti bilan 22 avgust tongi) Las-Vegasda bo‘lib o‘tadigan UFC on ESPN 29 musobaqasida jang qiladi. Unga guamlik Trevin Jons (13-6) raqib bo‘ladi.
Avvaliga Jons Mana Martinesga qarshi jang qilishi ko‘zda tutilgandi. Biroq bu jang bekor qilingan. Qahramonov jangga bir necha kun qolganda Martinesning o‘rinini egallashi maʼlum bo‘lgan.
Shu tariqa Qahramonov UFC‘da jang qiladigan to‘rtinchi o‘zbekistonlik bo‘ladi. Ayni vaqtda Mahmud Murodov, Zarrux Adashev va Liliya Shokirova ushbu promoushenda harakat qilmoqda.
Saidyoqub Qahramonov 1995 yilning 14 noyabrida Samarqandda tug‘ilgan. Shu vaqtga qadar sportchi professional MMA‘da o‘nta jang o‘tkazib, ularning 8 tasida g‘olib bo‘lgan va ikkita jangda yutqazgan. Mag‘lubiyatlaridan birini hozirda UFC‘da ishtirok etayotgan Umar Nurmagomedovdan qabul qilib olgan.
