Navoiyda quyosh stansiyasi ishga tushirilishi 80 mln kub metr gazni iqtisod qilish imkonini beradi – Shavkat Mirziyoyev

 

 

“Sizlarni Mustaqillik bayramining 30 yilligi arafasida ko‘rib turganimdan xursandman. Imkon qadar xalqimiz bilan ko‘proq muloqot qilyapmiz, pirovard maqsadimiz odamlarimiz roziligi, xalqimiz farovonligi. Faoliyatimizni kuzatayotgan bo‘lsangiz, har bir hududga aynan o‘sha yerni qiynayotgan muammolardan kelib chiqib yondashyapmiz.

Karmanadagi yashil energiya loyihasi bilan tanishish uchun nima uchun shaxsan o‘zim keldim? Sababi, biz aytgan rejalar faqat qog‘ozda qolib ketmaydi, har biri o‘ziga xos yangilik olib kelishi shart. Har birining ortida xalqimizga iqtisodiy farovonlik keltirishi kerak. Yaqinda tadbirkorlar bilan uchrashdim, ularni qiynayotgan muammolar ichida elektr energiyasi juda jiddiyligi maʼlum bo‘ldi.

Shu bois, muqobil elektr energiyasi hajmi oshmasa, arzon bo‘lmasa, biz ko‘zlagan maqsadlarimizga erisha olmaymiz. Bugun bu katta natijaga qator hamkorlarimiz bilan erishdik va bu faqat birinchi qadam. Endi bunday loyihalarni ko‘paytirishimiz, ishlab chiqariladigan uskunalarigacha o‘zimizda ishlab chiqarishni yo‘lga qo‘yishimiz kerak.

Vertolyotdan turib kuzatdim, 300 mingga yaqin panelni 270 gektar yerga o‘rnatdik. 5 ming megavatt quyosh va 3 ming megavatt shamol energiyasini o‘zlashtirishni rejalashtirganmiz. Bu rejalarimizni kuzatgan hamkorlarimiz, investorlarning ham bizga ishonchi ortyapti. Mana shu loyiha amalga oshishi bilan 80 mln kub/metr tabiiy gaz iqtisod qilinadi, bu gaz uylarga boradi. 

Bundan tashqari, 160 ming tonna zaharli gazlar havoga tarqalishining oldini oladi. Mening oxirgi majlisim ekologiya to‘g‘risida bo‘ldi. Mana ekologiya uchun jiddiy qadam”, deya taʼkidladi prezident.

 

Eslatib o‘tamiz, bundan avvalroq Prezident Shavkat Mirziyoyev 27 avgust kuni Navoiy viloyatiga jo‘nab ketgani to‘g‘risida xabar bergandik.