Navoiyga ijtimoiy masalalar uchun 100 mlrd so‘m ajratildi – Prezident
Prezident Shavkat Mirziyoyev Navoiy viloyatiga tashrifi doirasida quyosh stansiyasi ochilishida ishtirok etdi va shu yerda hudud faollari bilan uchrashuv o‘tkazdi.
“Albatta, prezident qayerlarga borishini sizlar muntazam kuzatib turasizlar. Navoiyga ertaroq kelishim ham mumkin edi. Lekin tashrifim bayramimiz arafasiga to‘g‘ri kelganida ham ramziy maʼno bor. O‘zim kelolmagan bo‘lsam-da, oldingizda yuzim yorug‘, yil boshidan ijtimoiy masalalar uchun 100 mlrd so‘m ajratildi.
Mana hokim Qobil Tursunov aytsin, 100 mlrd so‘m ajratdim va eng muhim masalalarni hal qilishga sarflashni tayinladim. Bu safar yana ajrataman – Navoiydagi har bir muammoni muhokama qilamiz. Xudo xohlasa, shunday qilamizki, Navoiyda kam taʼminlangan odam bo‘lmaydi.
Mana shu stansiyalarni nima uchun ishga tushiryapmiz – xalqimiz farovonligi uchun. Men albatta, birinchi navbatda, o‘z xalqim manfaatini o‘ylashim kerak. Lekin niyatim shuki, bunday yutuqlar nafaqat bizda bo‘lsin, qo‘shnilarimizda ham bo‘lsin. Ularning ham, tinchligini, baxtini bersin”, dedi prezident.
Avvalroq Prezident Shavkat Mirziyoyev Navoiyda quyosh stansiyasi ishga tushirilishi 80 mln kub metr gazni iqtisod qilish imkonini berishi haqida aytgandi.
