Shavkat Mirziyoyev Islom Karimov haykali poyiga gul qo‘ydi
Prezident Shavkat Mirziyoyevning qaroriga muvofiq, Islom Karimov vafot etgan 2 sentyabr sanasi Xotira kuni sifatida belgilangan. Bu kunda jamoatchilik yig‘ilib, birinchi prezidentimizni yod etish ezgu anʼanaga aylangan, deya xabar bermoqda prezident matbuot xizmati.
Davlat rahbari va hukumat aʼzolari Islom Karimov nomidagi yodgorlik majmuasida birinchi prezident xotirasiga hurmat ko‘rsatdi.
“Davlatimiz rahbari bugun Islom Karimov nomidagi ilmiy-maʼrifiy yodgorlik majmuasiga tashrif buyurdi. Birinchi Prezidentimiz haykali poyiga gulchambar qo‘yib, uning xotirasiga hurmat bajo keltirdi.
Qurʼon tilovat qilindi.
O‘tganlarni yaxshiliklari bilan eslash – ezgu fazilat. Ajdodlar hurmatini joyiga qo‘ygan insonning o‘zi ham hurmatga loyiq.
Shavkat Mirziyoyev istiqlolimizning 30 yillik bayramiga bag‘ishlangan tantanali marosimda Islom Karimov O‘zbekiston mustaqilligini eʼlon qilib, tariximizning eng murakkab va og‘ir davrlarida davlatimizni boshqarganini taʼkidladi.
Ushbu xotira tadbiri ham xalqimizning Birinchi Prezidentga hurmati ifodasidir.
Marosimda O‘zbekiston Respublikasi Oliy Majlisi Senati va Qonunchilik palatasi, Prezident Administratsiyasi, Vazirlar Mahkamasi, vazirlik va idoralar, poytaxt jamoatchiligi vakillari ham ishtirok etdi.
Islom Karimovning Samarqand va Qarshi shaharlaridagi haykallari poyiga ham gullar qo‘yildi”, – deyiladi xabarda.
