Prezident Shavkat Mirziyoyev 9 sentyabrda O‘zLiDeP qurultoyida ishtirok etadi
9 sentyabr kuni Shavkat Mirziyoyev Tadbirkorlar va ishbilarmonlar harakati – O‘zbekiston liberal-demokratik partiyasi qurultoyida ishtirok etadi. Bu haqda prezident matbuot kotibi Sherzod Asadov maʼlum qildi.
Prezident matbuot kotibi Sherzod Asadov anʼanaviy brifingda OAV vakillariga davlat rahbari Shavkat Mirziyoyevning o‘tgan haftadagi tadbirlari va joriy haftadagi rejalari bo‘yicha maʼlumot berdi.
“Bugun [6 sentyabr kuni] farmatsevtika sanoatida va Toshkent shahrida amalga oshirilayotgan loyihalar taqdimoti o‘tkazilishi rejalashtirilgan.
Shuningdek, hafta davomida strategik sohalardagi investitsiya loyihalari, “1 million dasturchi” loyihasining ijrosi, Prezident maktablari va ixtisoslashgan maktablar faoliyati bo‘yicha taqdimotlar o‘tkazilishi ko‘zda tutilgan.
Davlatimiz rahbari Paralimpiya o‘yinlari sovrindorlari bilan uchrashishi ham mo‘ljallanmoqda.
9 sentyabr kuni Shavkat Mirziyoyev Tadbirkorlar va ishbilarmonlar harakati – O‘zbekiston liberal-demokratik partiyasi qurultoyida ishtirok etadi”, – deya maʼlumot berdi prezident matbuot kotibi.
Partiya 7 avgust kuni bo‘lib o‘tgan navbatdan tashqari plenumida Shavkat Mirziyoyev nomzodini ilgari surgandi. Endi uning nomzodi O‘zLiDeP qurultoyida tasdiqlanishi lozim bo‘ladi.
Maʼlumot uchun, O‘zLiDeP 2016 yilgi prezidentlik saylovlarida ham Shavkat Mirziyoyev nomzodini ilgari surgandi.
