Alisher Qodirov talabalar undan yordam so’rashayotganini aytdi
O‘zbekiston Respublikasi Prezidentligiga “Milliy Tiklanish” DPdan nomzod Alisher Qodirov talabalar undan yordam so‘rashayotganini aytmoqda. Bu haqda u o‘zining ijtimoiy tarmoqdagi sahifasida yozib qoldirgan.
Ko‘p yoshlar qo‘shni davlatlarning oliygohlaridan o‘qishlarini O‘zbekiston oliygohlariga ko‘chirish uchun qiyin talablar bo‘layotganidan norozi bo‘lib, bu masalada yordam berishimni so‘ramoqdalar.
Yordam bera olmayman, chunki o‘rningizga imtihon topshira olmayman.
O‘zbekiston oliygohlariga o‘qishni ko‘chirish uchun topshiriladigan testda minimum 67 ball to‘plash talab qilinmoqda. Bu juda past ball.
Qolaversa, qo‘shni davlatlardagi “oliygohlarga” nima maqsadda o‘qishga kirilayotganini hammamiz ham yaxshi bilamiz.
Shu bilan birga, o‘qishga intilayotgan yoshlarni shu kabi “o‘yinlar”ga majburlayotgan saralash tizimini ham o‘zgartirish haqida o‘ylash vaqti keldi.
Albatta, odamlarda shakllanib qolgan: “oliy maʼlumot diplomi - kafolatlangan farovonlik” degan qarashni ham o‘zgartirish kerak. Maktab shahodatnomasi bilan, aql va mantiqni ishlatgan tadbirkor ikkita diplom bilan 8 dan 22 gacha, boshini egib 5 million so‘m maosh olayotgan davlat xizmatchisidan bir necha barobar ko‘p daromad topyapti va yaxshiroq yashayapti.
Menimcha, oliy maʼlumot olish ishtiyoqi bo‘lgan yoshlarga imkoniyat berish kerak. Kirish imtihonlari oson bo‘lsin. 1-2 yil ichida zo‘rlar va zo‘rakilarni ajratib olib davlat va biznes grantlarini taqdim etishi mumkin.
Mashaqqatli bilim olish jarayoni - tonnalab ruda ichidan grammlab oltinni ajratib olgandek soha mutaxassislarini tasodiflardan ajratib oladi. Bir parcha qog‘oz uchun, o‘zini aldab, o‘zi topmagan pulni sovurib yurganlar esa juda qimmatga “o‘zini anglash” saboqlarini sotib oladilar.
Oliy taʼlim olish uchun “kirish oson, lekin chiqish qiyin” tizim bo‘lishi tarafdoriman. Oliy taʼlim juda qimmat mahsulot. U nafaqat mablag‘, balki kuchli ishtiyoq va mehnat talab qiladi.
Diplom - darajani belgisi bo‘lishi kerak, ko‘zbo‘yamachilik quroli emas.
Keskinroq gapirgan bo‘lsam uzr so‘rayman, meni qo‘llab-quvvatlamasligingiz mumkin, lekin o‘zimizni aldashni bas qilaylik.
Hamma sohaga yaxshi mutaxassislar kerak. Millionlab diplomli savodsizlar mamlakatni xarob qilyapti. Bu muqarrar inqiroz yo‘li.Oliy taʼlim berish tizimi jiddiy isloh qilinishi shart!
