Hindiston–Xitoy ziddiyati: Dehli tog‘li hududlarda jangovar tayyorgarlikni kuchaytirmoqda
Hindiston–Tibet chegara politsiyasi tarkibidagi maxsus bo‘linmalar yaqin masofadagi janglar, tog‘li hududlarda harakatlanish va dronlardan foydalanish bo‘yicha tayyorgarlikdan o‘tkazilmoqda.
Hindiston Xitoy bilan bahsli chegara hududlarida yuzaga kelishi mumkin bo‘lgan to‘qnashuvlarga tayyorgarlik ko‘rish maqsadida chegara politsiyasi tarkibidagi maxsus bo‘linmalarni kuchaytirmoqda.
Harbiy xizmatchilar yaqin masofadagi janglar, baland tog‘li hududlarda harakatlanish, dronlar yordamida kuzatuv olib borish va mahalliy to‘qnashuvlarga tezkor javob qaytarish bo‘yicha tayyorgarlikdan o‘tmoqda. Bu haqda Nikkei Asia xabar berdi.
Nashr ma’lumotiga ko‘ra, 2020-yilda Galvan vodiysida Hindiston va Xitoy harbiylari o‘rtasida yuz bergan to‘qnashuvlardan so‘ng Hindiston–Tibet chegara politsiyasi tarkibida “Shaurya” nomli maxsus bo‘linmalar tashkil etilgan. Hozirda ushbu guruhlarning jangovar tayyorgarligiga alohida e’tibor qaratilmoqda. Chegara politsiyasi rahbariyati ularning faoliyatini ijobiy baholagan.
Yangi bo‘linmalar Hindistonning Xitoy bilan bahsli chegara hududlarini qo‘riqlash va ehtimoliy to‘qnashuvlarga tezkor javob qaytarish imkoniyatlarini oshirishi kutilmoqda.
Hindiston va Xitoy o‘rtasidagi Himolay tog‘lari orqali o‘tuvchi chegara hali to‘liq kelishib olinmagan. Ikki mamlakat hududlari 1962-yilgi urushdan keyin belgilangan Amaldagi nazorat chizig‘i (LAC) orqali ajratilgan. Shunga qaramay, tomonlar sharqdagi Arunachal-Pradesh va g‘arbdagi Aksaychin hududlari bo‘yicha hududiy da’volarini saqlab qolmoqda.
