Iordaniyada cherkovga qilingan hujum: uch nafar erkak o‘lim jazosiga hukm qilindi
Hujum 23-oktyabr kuni yunon pravoslav cherkovida dafn marosimi vaqtida sodir bo‘lgandi.
Iordaniya Davlat xavfsizligi sudi mamlakat janubidagi Karak viloyatida cherkovga hujum uyushtirib, to‘qqiz kishining o‘limiga sabab bo‘lgan uch nafar erkakni o‘lim jazosiga hukm qildi. Bu haqda Reuters xabar berdi.
Sudlanuvchilar o‘lim bilan yakunlangan terrorchilik harakatlarini sodir etish, terrorchilik maqsadlarida qurol va o‘q-dorilar saqlash, shuningdek, terrorchilik guruhi mafkurasini targ‘ib qilishda aybdor deb topilgan. Hukm ustidan shikoyat qilish mumkin, bundan tashqari, u Kassatsiya sudi tomonidan majburiy tartibda qayta ko‘rib chiqiladi.
Hujum 23-oktyabr kuni Hamud qishlog‘idagi yunon pravoslav cherkovida dafn marosimi vaqtida sodir bo‘lgan. Qurollangan shaxslar yig‘ilganlarga qarata o‘t ochgan. Oqibatda to‘qqiz kishi halok bo‘lgan, yana 34 kishi jarohatlangan. Mazkur hodisa Iordaniyadagi xristian ozchiligiga qarshi kamdan kam uchraydigan hujumlardan biri bo‘ldi.
Iordaniya xavfsizlik kuchlari 26-oktyabr kuni Karakdagi tashlandiq uyda yuz bergan otishmadan so‘ng uch nafar gumonlanuvchini qo‘lga olgan. Otishma vaqtida ularning barchasi yaralangan, xavfsizlik xizmati xodimlari orasida esa jabrlanganlar bo‘lmagan.
Shu kuni Iordaniya Suriyaning janubida cherkovga qilingan hujumga aloqador deb hisoblangan guruhlarga qarshi havo zarbalari bergan. Suriya rasmiylari zarbalar oqibatida yetti kishi, jumladan, uch nafar bola va bir ayol halok bo‘lganini bildirgan.
Keyinchalik Iordaniya havo zarbalari oqibatida Suriyada tinch aholi vakillari halok bo‘lganini tan oldi. 9-noyabr kuni ikki davlat hodisa va uning oqibatlarini o‘rganish uchun qo‘shma xavfsizlik qo‘mitasini tuzishga kelishib olgani ma’lum bo‘ldi.
