Eron va Tojikistonning Afg‘oniston bo‘yicha pozitsiyasi yaqin – Eron Prezidenti
Eron Prezidenti Ibrohim Raisiy SHHT doirasidagi tashrifi yakunida Eron va Tojikiston Afg‘oniston masalasida umumiy qarashlarga ega ekanini maʼlum qildi. Bu haqda “Sputnik Afganistan” xabar berdi.
“Afg‘onistondagi vaziyat yuzasidan pozitsiyalarimiz o‘xshash. Kelgindilar mamlakatda barqarorlikni taʼminlay olmadi, aksincha, u yana-da chigallashdi. Afg‘oniston uchun eng muhimi – barqarorlik”, degan Raisiy.
Uning fikricha, mamlakat taqdirini afg‘onistonliklarning o‘zi hal qilishi kerak. Bundan tashqari yangi tuziladigan hukumat inklyuziv bo‘lishi lozimligi alohida taʼkidlangan.
Shuningdek, Eron prezidenti Afg‘onistonda terrorchilarning mavjudligi butun mintaqa uchun xavfli ekanini qayd etgan. Raisiy “Biz terrorizmni rivojlantiradigan va unga yangi kuch beradigan barcha oqim va yo‘nalishlarga qarshimiz”, deb aytgan. Eron yetakchisi Afg‘onistonda mustahkam tinchlikka faqat muzokaralar vositasida erishish mumkinligini maʼlum qilgan.
16-17 sentyabr kunlari Dushanbeda SHHTning navbatdagi sammiti bo‘lib o‘tdi. Unda tashkilotga aʼzo davlat rahbarlari ishtirok etgan. Sammitda Afg‘oniston masalasi bo‘yicha muhim bayonotlar berildi.
Xususan, Panjsher qarshilik kuchlari va “Tolibon” o‘rtasida Tojikistonda muzokaralar o‘tkazilishi maʼlum qilingan. Ushbu jarayonda Tojikiston va Pokiston vositachilik qiladi.
O‘zbekiston Respublikasi Prezidenti Shavkat Mirziyoyev Afg‘onistonning muzlatib qo‘yilgan aktivlarini qaytarib berishga chaqirdi. Prezidentning fikricha, bu Afg‘onistondagi gumanitar inqirozning oldini oladi. Mirziyoyev real vaziyatdan kelib chiqib mamlakatning yangi hukumati bilan muloqot o‘rnatish zarurligini taʼkidlagan.
Maʼlumot o‘rnida: 15 avgust kuni “Tolibon” harakati Kobulni egallagan. 31 avgustda AQSH Afg‘onistonni to‘liq tark etdi. Harakat tomonidan egallanmagan yagona viloyat Panjsher edi. Ammo 6 sentyabrda ushbu hudud ham “Tolibon” nazoratiga o‘tdi. Shundan keyin toliblar 7 sentyabr kuni mamlakatning yangi hukumati tuzilganini eʼlon qildi.
Eslatib o‘tamiz, bundan avval “Tolibon” vakili doimiy hukumat tuzilishi haqidagi savolga aniq javob bermagani xabar qilingan edi.
Jahongir Qo‘ziyev
