Шавкат Мирзиёев Афғонистоннинг музлатиб қўйилган активларини қайтариб беришга чақирди
Президент Шавкат Мирзиёев бугун Душанбе шаҳрида ШҲТдаги йиғилишда қилган маърузасида Афғонистоннинг музлатиб қўйилган активларини қайтариб беришга чақирди. Бу ҳақда “Спутник Узбекистан” хабар бермоқда.
Президентнинг фикрича, бу Афғонистондаги гуманитар инқирознинг олдини олишга кўмак беради. Шавкат Мирзиёев реал вазиятдан келиб чиқиб мамлакатнинг янги ҳукумати билан мулоқот ўрнатиш зарурлигини таъкидлаган.
Шунингдек, Ўзбекистон раҳбари Тошкентда Афғонистон-ШҲТ шаклида олий даражали учрашув ташкил этишни таклиф қилган.
Ўзбекистон Президенти ШҲТ доирасида бир қанча давлат раҳбарлари билан Афғонистондаги вазиятни муҳокама қилди. Жумладан, Тожикистон Президенти Эмомали Раҳмон ва Покистон Бош вазири Имрон Хон билан қўшни республикадаги вазият юзасидан фикр алмашди.
Афғонистонда гуманитар вазият тобора ёмонлашиб бормоқда. Турли давлатлар мамлакатга ёрдам жўнатиб турибди. Хусусан, Ўзбекистон 14 сентябрда 1.3 минг тонна кўмак берди. Шунингдек, БМТ афғон халқи учун қўшимча 1 миллиард доллар маблағ ажратишини эълон қилган.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин толиблар 7 сентябрь куни мамлакатнинг янги ҳукумати тузилганини эълон қилди.
Жаҳонгир Қўзиев
