Pentagon Rossiyani AQSH va Yevropa uchun asosiy tahdid sifatida baholadi
Pentagon Rossiyani AQSH va Yevropa uchun asosiy tahdid sifatida baholadi, deya xabar bermoqda “TASS”.
AQSH mudofaa vazirining siyosiy masalalar bo‘yicha o‘rinbosari Kolin Kol Rossiya yaqin vaqt ichida Vashington uchun katta muammoga aylanishi mumkinligini aytgan. “Rossiya yaqin yillarda xavfsizlik nuqtai nazaridan AQSH va Yevropa uchun asosiy tahdid bo‘lib qoladi. Moskva tobora hujumkor raqibga aylanib bormoqda. U o‘zining taʼsir doirasini kengaytirish barobarida G‘arb davlatlari o‘rtasida nizo qo‘zg‘ash orqali qo‘poruvchilik vazifasini bajarmoqda”, — degan Kol.
Pentagon vakilining fikricha, Rossiyaning Yevropa, Osiyo va Yaqin Sharq, shuningdek, kibermakondagi harakatlari AQSH va uning ittifoqchilari uchun asosiy tahdid hisoblanadi. “Moskva shaffoflikdan tez-tez yiroqlashib, o‘z maqsadlariga erishish uchun harbiy kuchlardan foydalanishdan ham toymaydi. Shu bois AQSH Rossiyaning NATO sharqiy chegaralari va Qora dengizdagi faoliyatini doimiy kuzatib boradi”, — deb qo‘shimcha qilgan Kol.
Bundan avval AQSH generali Jon Xayten Rossiya va Xitoy bilan urushga yo‘l qo‘yib bo‘lmasligini maʼlum qilgan. Shuningdek, AQSH davlat kotibi sobiq yordamchisi Aaron Mitchel Vashingtonning global urushdagi imkoniyatlarini past baholagan edi.
Jahongir Qo‘ziyev
