Jalolobod shahrida yana bir portlash sodir bo‘ldi
Afg‘onistonning Nangarxor viloyati Jalolobod shahrida sodir bo‘lgan portlash oqibatida ikki kishi halok bo‘ldi, olti kishi jarohatlandi, deya xabar bergan mahalliy manbalarga tayanib “RIA Novosti”.
Xabarga ko‘ra, “Tolibon”ga tegishli mashinada bomba portlagan. Jabrlanganlar, shu jumladan, harakat jangarilari kasalxonaga yuborilgan. Hodisaning qolgan tafsilotlari hali ochiqlanmagan.
Eslatib o‘tamiz, 18-sentabr kuni Nangarxor viloyatining Jalolobod shahridagi portlashda uch kishi halok bo‘lib, 19 kishi jarohatlangandi. Ertasi kuni yana shu shaharda — avtovokzal hududida portlash sodir bo‘lgan, ikki tinch fuqaro vafot etgan, “Tolibon” tarafdorlaridan biri yaralangandi.
“Al-Arabiya” telekanalining xabar berishicha, portlashlar uchun javobgarlikni “Islomiy davlat” terrorchilik guruhi o‘z zimmasiga olgan. Undan so‘ng “Tolibon” Jalolobod chekkasida terrorchilardan tozalash operatsiyasini o‘tkazgani haqida xabar berilgandi. 22-sentabr kuni Jalolobodda yana bir nechta portlash va qurolli hujum sodir bo‘lishi oqibatida besh kishi (ikki nafari “Tolibon” tarafdori) halok bo‘lgandi.
Nasiba To‘xtayeva
