Talabalarga ijara to‘lovining bir qismini qoplab berish tartibi belgilandi
Davlat oliy taʼlim muassasalarining ijarada yashayotgan talabalariga oylik ijara to‘lovining bir qismi Davlat byudjeti hisobidan qoplab beriladi.
Unda aytilishicha, bu tartib ijarada yashaydigan talabalar uchun bo‘lib, ko‘chmas mulk egasi bilan ijara shartnomasi tuzilgan taqdirda, talaba arizasi asosida oylik ijara to‘lovining bir qismi qoplab beriladi.
Bunda ariza beruvchi talaba tegishli maʼlumot yoki hujjatlarni o‘zi taʼlim olayotgan fakultetning yoshlar bilan ishlash bo‘limi dekan o‘rinbosari yoki OTMning talabalarni turar joy bilan taʼminlash ishlarini muvofiqlashtiruvchi bo‘limiga topshiradi.
Masʼullar bir hafta davomida ariza beruvchi maʼlumotlarining ijtimoiy mezonlarga muvofiqligini o‘rganadi va ularni umumlashtirib, ko‘rib chiqish va xulosa berish uchun navbatdagi haftaning birinchi kunida talabgorlarni tanlab olish komissiyasiga taqdim etadi.
Komissiya bir ish kunida talabgorlar to‘g‘risidagi maʼlumotlarni o‘rganib chiqib, qaror qabul qiladi.
Shunga ko‘ra, davlat OTM rektori (filial direktori)ning buyrug‘i rasmiylashtirilib, arizalari qanoatlantirilgan talabgorlar to‘g‘risidagi tegishli maʼlumotlar va ularning ro‘yxati to‘lovlarni amalga oshirish uchun buxgalteriyaga taqdim etiladi.
Arizasi ijobiy hal etilgan talabalar uchun ijara to‘lovining bir qismi Davlat byudjeti mablag‘lari hisobidan ular ariza bergan sanadan boshlab qoplab beriladi.
Bitta turar joyda ikki va undan ortiq talaba ijara huquqi asosida yashagan holatlar bo‘lsa, ularning barchasi ijara shartnomasida qayd etilgan bo‘lishlari shart.
Ijara to‘lovining bir qismini qoplab berish bir necha mezon asosida amalga oshadi. Xususan, o‘quv yili davomida, yaʼni har yili 1-sentabrdan 1 iyulgacha yoki o‘qitish dasturi bo‘yicha, o‘quv yilining davomiyligiga qarab belgilanadi. Mazkur to‘lov arizalar har oyning 7-sanasigacha ariza beruvchi tomonidan masʼullarga taqdim etilganidan so‘ng amalga oshiriladi.
Ushbu muddatlar tugagandan keyin berilgan arizalar ko‘rib chiqilmaydi.
Mazkur tizim doimiy yashaydigan hududda taʼlim oladigan talabalar uchun amal qilmaydi. Shuningdek, mazkur tartib davlat OTMlarining faqat kunduzgi taʼlim shaklida o‘qib, ijarada yashaydigan talabalariga nisbatan tatbiq etiladi.
Bundan oldingi xabarlarda ijara to‘lovining qoplab beriladigan qismi Toshkent shahrida — BHMning bir baravari, qolgan hududlarda — BHMning 0,5 baravaridan oshmasligi lozim deb ko‘rsatilgan.
Аvvalroq ijarada turuvchi talabalarni tizimli nazorat qiluvchi mobil ilova yaratilgani, viloyatdan kelgan talabalarning turar-joy qidirib sarson bo‘layotgani hamda "Talabalar shaharchasi"dagi o‘rindiqlarda tunab qolayotgan oliygoh o‘quvchilari haqida xabar berilgandi.
Olamgir Abdiyev
