O'zbekistonda 10 dan ortiq bukmekerlik veb-saytlari bloklandi
Isteʼmolchilar huquqlarini himoya qilish agentligi Axborot va ommaviy kommunikatsiyalar agentligi bilan birgalikda bukmekerlik faoliyati bilan shug‘ullanuvchi 10 dan ortiq noqonuniy saytlariga kirishni cheklab qo‘ydi. Bu haqda “Spot.uz” xabar berdi.
Xabarda keltirilishicha, agentlik O‘zbekistonda bukmekerlik xizmati hali ham noqonuniy ekanligini eslatar ekan, endilikda hatto reklamada lotereyalar va bukmekerlar haqidagi maʼlumotlarni tarqatish taqiqlanganini taʼkidlagan.
Shunga qaramay, internetda bukmekerlarning onlayn bozori faol rivojlanmoqda. Isteʼmolchilar huquqlarini himoya qilish agentligi xodimlari doimiy ravishda ijtimoiy tarmoqlarda joylashtirilgan reklama maʼlumotlarining qonun talablariga muvofiqligini o‘rganishda davom etmoqda.
“Spot.uz” oldingi maʼlumotlariga tayanib yozishicha, O‘zbekistonda xorijiy bukmekerlar vositachilari faollashib, ko‘chalarda pul tikish jarayonining tashqi reklamasi paydo bo‘la boshlagan.
Shundan so‘ng, Isteʼmolchilar huquqlarini himoya qilish agentligi xodimlari Farg‘ona viloyatida “1xBet” reklamasi yozilgan bir nechta banner va plakatlarni demontaj qilib, tadbirkorlarga ogohlantirish bergan.
Bundan oldin bukmekerlik idoralariga qo‘yilgan taqiq ularning mamlakatdagi ishlariga deyarli xalaqit bermasligi aytilgandi. Ammo bukmekerlik tashkilotlari mamlakatdagi aholining talabini ko‘rib, xizmatlarini taklif qilishga shoshilishdi va hatto mahalliy sharoitga moslashishdi.
Ularning ko‘pchiligi mahalliy “Uzcard” va “HUMO” kartalaridan to‘lovlarni qabul qila boshladi.
Bukmekerlik idoralari o‘zlarini mamlakatda shunchalik qulay his qilmoqdaki, ular o‘z saytlarini o‘zbek tiliga tarjima qilishdi. Shuningdek, bu yerda so‘rovlarga javob beradigan, bir nechta tillarda gaplashadigan va bir nechta kanallar orqali qo‘llab-quvvatlash xizmatlarini ishga tushirdi.
O‘tgan yili Futbol assotsiatsiyasi matbuot xizmati rahbari Davron Fayziyev barchasini qonuniylashtirish, kelgusida toza faoliyatni nazorat qilish va taʼminlash maqsadida bukmekerlik idoralarini qonuniylashtirish tartibi qabul qilinganini aytgandi.
Bu orada xorijiy bukmekerlik idoralari O‘zbekistonda savdo belgilarini ro‘yxatdan o‘tkazishda va xodimlarni mamlakatdan qidirishda davom etmoqda.
Ular bir necha yillardan buyon bukmekerlik faoliyatini qonuniylashtirishga urinmoqda.
Maʼlumot uchun: 2021-yil 1-yanvardan boshlab Kapital bozorini rivojlantirish agentligidan (ARRK) litsenziya olish orqali bukmekerlik faoliyatini amalga oshirish uchun ruxsat berilgandi. Biroq boshqa chora-tadbirlar (qonun hujjatlariga o‘zgartirishlar) kiritilmadi va keyinchalik agentlik umuman tugatildi.
Avvalroq havoga uchgan million dollarlar yoxud onlayn qimor jabrdiydalari, оnlayn qimorda yutqazgan yigit o‘g‘irlik sodir etgani hamda O‘zbekistonda bukmekerlik va totalizator faoliyati hali ham qonuniy emasligi maʼlum qilingani haqida xabar berilgandi.
Olamgir Abdiyev
