“Qamchiq” dovonida 4 ta mashina ishtirokida YTH sodir bo‘ldi
“Qamchiq” dovonida bugun, 6-oktabr kuni 4 ta mashina ishtirokida YTH yuz berdi. Bu haqda FVV matbuot xizmati xabar berdi.
Maʼlum qilinishicha, ertalab soat 06:20 larda Qamchiq dovonining 199 kilometrida Vodiy — Toshkent yo‘nalishida harakatlangan “Spark” haydovchisi boshqaruvni yo‘qotib, yo‘l o‘rtasidagi temir to‘siqqa urilgan. Uning ortidan kelayotgan, “Gentra” avtomobili “Spark”dan qochaman deb, “Cobalt” va “Gentra”ga ham urilgan.
"Zudlik bilan Qamchiq MQYOQB qutqaruvchilari, tez tibbiy yordam, YPX, “Qamchiqavtoyo‘l” Ixtisoslashgan yo‘llardan foydalanish unitar korxonasi xodimlari voqea joyiga yetib borgan. Qutqaruvchilar jarohat olgan fuqarolarni avtomoshinalar ichidan chiqarib olgan", — deyiladi xabarda.
Qayd etilishicha, “Spark” salonida haydovchi va bir nafar yo‘lovchi bo‘lib, yo‘lovchi tan jarohati olgan. “Cobalt”ning haydovchisi o‘ng qo‘l sinishi tashxisi bilan Angren shahar Markaziy shifoxonasiga yuborilgan.
Hozirda shifokorlar ularning ahvoli yaxshilanganini bildirgan. Qolgan avtoulovdagi yo‘lovchi va haydovchilar yengil tan jarohati olgani sabab ularga shu joyning o‘zida birinchi tibbiy yordam ko‘rsatilgan.
Taʼkidlanishicha, ushbu yo‘l-transport hodisasi avtomobil haydovchilari noqulay ob-havo sharoitini inobatga olmay, tezlikni oshirib haydashi oqibatida yuz bergan.
Avvalroq Bo‘stonliqda 150 metr balandlikdan “Spark” jarlikka tushib ketgani, Namangan viloyati Pop tumanida “Nexia” yo‘l chetidagi pastlikka qulashi oqibatida yo‘lovchi ayol vafot etgani, shuningdek, Vodiy—Toshkent yo‘nalishida harakatlangan “Cobalt” avtomobili ag‘darilib ketgani hamda Qamchiq dovonida “Nexia” yo‘lovchisi pastlikka tushib ketgani haqida xabar berilgandi.
