Бўстонлиқда 150 метр баландликдан "Spark" жарликка тушиб кетди, ҳайдовчиси омон қолди (видео)
Тошкент вилоятининг Бўстонлиқ туманида автоҳалокатга учраган автомобиль ҳайдовчисининг ҳаётини хавфсизлик камари қутқариб қолди. Бу ҳақда ФВВ матбуот хизмати хабар бермоқда.
"1 октябрь куни "Spark" автомобили Чимён томон ҳаракатланаётган бўлган. Тошкент — Чимён автомобиль йўлининг Бўстонлиқ тумани ҳудудига кирувчи 76-километрида ҳайдовчи бошқарувни йўқотиши оқибатида машина йўлдан 150 метр пастга тушиб кетган", — дейилади хабарда.
Маълум қилинишича, ҳайдовчи аёл хавфсизлик камарини таққани сабаб омон қолгани айтилмоқда. Унга ҳеч қандай шикаст етмаган, фақат бироз қўрқув босган, холос.
Қайд этилишича, йўл-транспорт ҳодисаси жойига Тошкент вилояти ФВБнинг қутқарув отряди етиб келган. Қутқарувчилар ҳайдовчига психологик ёрдам кўрсатган. Автомобиль эса бир неча дақиқа ичида махсус техникалар ёрдамида чиқариб олинган.
Аввалроқ “Nexia” ҳайдовчиси маст ҳолда ҳаракат хавфсизлигини таъминлай олмай Фарғона каналига тушиб кетганди. Шунингдек, Наманган вилояти Поп туманида "Nexia" йўл четидаги пастликка қулаши оқибатида йўловчи аёл вафот этгани, Водий— Тошкент йўналишида ҳаракатланган “Cobalt” автомобили ағдарилиб кетгани ҳамда Қамчиқ довонида "Nexia" йўловчиси пастликка тушиб кетгани ҳақида хабар берилганди.
