"Hududlarda yurishim, odamlarni rozi qilish, aholi jon boshiga daromadni ko‘paytirish" — Prezident
Prezident Shavkat Mirziyoyev Sirdaryo tumani “Shirin” mahallasida yashovchi Doniyor Yo‘ldoshev xonadonida bo‘lib, oilaning turmush sharoitlari bilan tanishdi.
Prezident matbuot xizmati xabariga ko‘ra, bu uy yurtimizdagi obod hovlilardan biri. 10 sotix tomorqada mevali va manzarali daraxtlar, sabzavotlar ekilgan. 30 bosh naslli kurka boqilib, bir yilda 25 million so‘mgacha qo‘shimcha daromad olinmoqda.
Davlatimiz rahbari bu saʼy-harakatlarni maʼqullab, mana shunday obod xonadonlar ko‘payishi kerakligini taʼkidladi.
- Hududlarda yurishim, har kungi harakatlarimdan maqsad - odamlarni rozi qilish, aholi jon boshiga daromadni ko‘paytirish. Ilgari chetga xomashyo sotardik. Hozir hammasini mamlakatimizda qayta ishlab, tayyor mahsulot chiqarayapmiz. Korxonalar ochilayapti, yoshlarimiz, xotin-qizlarimiz ishli bo‘layapti. Bundaylar ko‘payishi, buning uchun rivojlanish mahallada bo‘lishi kerak. Mahalla yaxshi bo‘lsa, davlat kuchli bo‘ladi. Yoshlarni bilimli, aqlli qilib tarbiyalasak, o‘z yo‘lini, ishini topadi, - dedi Shavkat Mirziyoyev.
Yurtimizga tinchlik, farovonlik tilab, duo qilindi.
Avvalroq O‘zLiDePdan ko‘rsatilgan nomzod Shavkat Mirziyoyev Sirdaryo tumanidagi sanoat zonasida partiya faollari, yoshlar va OAV vakillari bilan uchrashgani, “Sirdaryo mega lyuks” qo‘shma korxonasi faoliyati bilan tanishgani hamda Sirdaryo viloyati taraqqiyoti borasida to‘xtalib o‘tgani haqida xabar berilgandi.
