Shavkat Mirziyoyev: "Tadbirkor ham daromad topsin, odamlar ham"
Prezident Shavkat Mirziyoyev 7-oktabr kuni Sirdaryo viloyatiga kelib, “Sirdaryo mega lyuks” qo‘shma korxonasi faoliyati bilan tanishdi. Bu haqda davlat rahbari matbuot xizmati xabar ber berdi.
O‘tgan yili bu yerda polipropilendan katta sig‘imli qoplar ishlab chiqarish yo‘lga qo‘yilgan edi. “Yumshoq konteyner” deb ataluvchi bu qoplar 500 kilogrammdan 5000 kilogrammgacha yuk ko‘taradi. Ularga ishlab chiqarish, savdo, qishloq xo‘jaligi, logistika kabi ko‘plab sohalarda talab yuqori. “Sirdaryo mega lyuks” yiliga 132 million dona shunday mahsulot tayyorlash quvvatiga ega.
Yettita korpusdan iborat ulkan korxona izchil rivojlanib bormoqda. Joriy yil may oyida ikki qavatli plyonka tayyorlash yo‘lga qo‘yildi. Yaqin oylarda strech plyonka va spanbond texnologiyasi asosida noto‘qima mato ishlab chiqarish boshlanadi.
Hozirda korxonada 2 mingdan ortiq kishi ish bilan taʼminlangan. Mazkur loyihalar to‘liq quvvatga chiqqach, ish o‘rinlari 5 mingga yetadi.
Bugungi kunda Rossiya, Isroil, Belarus, Ukraina, Qozog‘iston kabi 14 ta mamlakatga eksport yo‘lga qo‘yilgan. Yangi loyihalar bilan birgalikda eksport hajmi 215 million dollarga yetishi mo‘ljallangan.
Davlatimiz rahbariga istiqboldagi loyihalar haqida ham maʼlumot berildi.
Unga ko‘ra, kelgusi besh yilda polimer mahsulotlari ishlab chiqarish bo‘yicha texnopark tashkil etib, umumiy qiymati 350 million dollar bo‘lgan sakkizta loyihani amalga oshirish rejalashtirilgan. Buning uchun 260 million dollar investitsiya jalb etilib, Germaniya, Italiya, Avstriya texnologiyasi o‘rnatiladi.
Prezidentimiz loyihalarning iqtisodiy samaradorligi bilan birga ijtimoiy jihatiga ham alohida eʼtibor qaratish zarurligini taʼkidladi.
- Bu mahsulotlarning xomashyosi o‘zimizda, ona zaminimizda. Bundan aql bilan foydalanib, narx va sifat mutanosibligi taʼminlansa, mahsulotlarimiz raqobatbardosh bo‘ladi. Faqat iqtisodiy emas, iqtisodiy-ijtimoiy loyihalar qilish kerak. Tadbirkor ham daromad topsin, odamlar ham, - dedi Shavkat Mirziyoyev.
Zarur mablag‘ yo‘naltirib, ishlab chiqarish hajmini ikki barobar oshirish, kelgusida ishchilar uchun uy-joylar barpo etish bo‘yicha ko‘rsatmalar berildi.
Avvalroq O‘zLiDePdan ko‘rsatilgan nomzod Shavkat Mirziyoyev Sirdaryo tumanidagi sanoat zonasida partiya faollari, yoshlar va OAV vakillari bilan uchrashgani hamda Sirdaryo viloyati taraqqiyoti borasida to‘xtalib o‘tgani haqida xabar berilgandi.
