O‘zbekistonlik quruvchilarni Rossiyada “kosmik istiqbollar” kutmoqda
Rossiya qurilishiga, shu jumladan “Vostochniy” kosmodromiga, oktyabr oyida 10 ming o‘zbekistonlik jalb etilishi kutilyapti.
Rossiya qurilish va uy-joy kommunal xo‘jaligi vaziri o‘rinbosari Nikita Stasishinning so‘zlariga ko‘ra, quruvchilar shu oyning o‘zidayoq sinov loyihasi doirasida mamlakatga kelishadi.
Mutasaddi so‘zlarida davom etar ekan, “Masala yuzasidan O‘zbekistonlik hamkasblarimiz, qolaversa Rostrud va Federal tibbiy-biologik agentligi bilan deyarli har kuni ish olib boryapmiz”, — deya maʼlum qilgan.
Muhojirlarni Rossiyaga kelishidan avval “Sputnik Layt” bilan vaksina qilish rejalashtirilgan.
Maʼlumot o‘rnida, mazkur masala bo‘yicha joriy yilning 10-11 sentyabr kunlari Rossiya Federatsiyasining mehnat migratsiyasi bo‘yicha delegatsiyasining mamlakatimizga tashrifi doirasida keng muzokaralar olib borilgandi.
Unga ko‘ra,
— Qurilish sohasida mehnat faoliyatini amalga oshirish uchun Rossiya Federatsiyasiga jo‘natiladigan nomzodlarni ishga jalb qilish bilan bog‘liq, jumladan, tibbiy ko‘rikdan o‘tkazish, emlash, rus tili, Rossiya tarixi va qonunchiligi bo‘yicha imtihon topshirish, patent rasmiylashtirish va transport xarajatlari ish beruvchilar tomonidan qoplanishi ko‘zda tutilgan.
— Rossiya Federatsiyasi hududida mehnat faoliyatini amalga oshirish istagida bo‘lgan fuqarolarni emlash va koronavirusga qarshi test topshirish jarayonlari ikki davlat mutaxassislari tomonidan Rossiya tomoni tibbiy uskunalari yordamida birgalikda O‘zbekistonda amalga oshiriladi.
— Rossiya Federatsiyasi hududida mehnat faoliyatini amalga oshirish istagida bo‘lgan fuqarolar uchun patent olishda talab etiladigan daktiloskopik ro‘yxatga va rasmga olish jarayonlarini ikki davlat Ichki ishlar vazirliklari tomonidan Rossiya tomoni uskunalari yordamida O‘zbekistonda amalga oshiriladi.
Avvalroq Rossiyada migratsiya to‘g‘risida yagona hujjat joriy etilgandi. Shuningdek, o‘n ming O‘zbekistonlik yaqin vaqt davomida Rossiyaga ishga jalb qilinishi, Tashqi Mehnat migratsiyasi orqali ishlashga ketgan fuqarolarning noroziligi, Rossiyada yuz bergan ommaviy mushtlashuvda ishtirok etgan migrantlar 40 yilga deportatsiya qilingani hamda Rossiya migrantlarga yangi majburiyat yuklamoqchiligi haqida xabar berilgandi.
