O‘zbekistonlik 7 nafar sportchida doping aniqlandi
Ularning 3 nafari xalqaro musobaqa ishtirokchisi hisoblanadi Bu haqda AOKAda o‘tkazilgan brifingda Milliy antidoping agentligi axborot xizmati rahbari Humoyun Omonov maʼlum qildi.
Qayd etilishicha, agentlik tomonidan o‘tgan 9 oy davomida barcha sport turlari bo‘yicha o‘zbekistonlik sportchilardan 312 ta doping-sinamalar olindi va 4 ta sportchi taqiqlangan modda isteʼmol qilganligi aniqlandi.
Bundan tashqari, 3 ta xalqaro musobaqada ham doping-sinamalarni olish Agentlikka ishonib topshirildi. Natijada, 41 nafar sportchi tekshiruvdan o‘tkazilib, ularning 3 nafari taqiqlangan modda isteʼmol qilganligi maʼlum bo‘ldi.
“Tokio-2020” yozgi Olimpiya va Paralimpiya o‘yinlari davomida barcha sportchilar qatori o‘zbekistonlik sportchilardan ham doping-sinamalar olindi.
Shu bilan birga, o‘zbekistonlik olimpiya spotchilarining 16 nafaridan doping-sinama olinib, ulardan 11 tasi musobaqadan oldin tekshirilgan bo‘lsa, 5 tasi bevosita musobaqa finalidan keyingi davrga to‘g‘ri keldi.
Taʼkidlanishicha, paralimpiya sportchilarimizdan esa jami 39 ta doping-sinama olingan va ulardan 21 tasi musobaqadan oldin va 18 tasi musobaqa davrini o‘z ichiga oladi.
Musobaqadan oldin olingan tezkor doping-sinamalarning barchasida taqiqlangan moddalar aniqlanmaganligi bois sportchilarimiz bahslarda ishtirok etdi.
Maʼlumot o‘rnida: musobaqa sovrinli o‘rinlarga sazovor bo‘lgan jahon hamda olimpiya va paralimpiya rekordlarini o‘rnatgan sportchilarimiz doping tekshiruvidan o‘tdi. Odatda, ular tezkor tahlil qilinmasligi bois, natijalar belgilangan muddatlarda eʼlon qilinadi.
Bundan avval sportchilarimiz virusdan o‘zini qanday himoya qilayotgani haqida xabar berilgandi.
Cho‘lponoy Ahmedova,
Jamshidbek Amirov
