“Sputnik”da 149 gektarni o‘z ichiga olgan eski yog‘och uylar buzilib, o‘rniga ko‘p qavatli yangi uylar quriladi
Yangihayot tumanining “Sputnik” dahasida 149 gektar hududda xavfsizlik talablariga javob bermaydigan ikki va bir qavatli yog‘och uylar mavjud.
Bu uylar 1966-yilgi zilziladan so‘ng vaqtincha foydalanish uchun tez fursatda qurilgan.
Prezident Shavkat Mirziyoyev Toshkent shahridagi eski uylar bo‘yicha o‘z rejasini maʼlum qildi.
— Shahar hududidagi avariya holatiga kelgan, 60-70 yil avval qurilgan ko‘p qavatli uylar o‘rniga zamonaviy turar-joylarni barpo etish bo‘yicha "Renovatsiya dasturi" amalga oshiriladi. Bunda ushbu uylarda yashaydigan aholini rozi qilib, ularga yangi uylardan maqbul takliflar berilishi shart. Biror kishi norozi bo‘lmasligi lozim. Agar o‘sha uylarda yashovchi aholi boshqa hududga ketishni istamasa, yangi qurilayotgan uylardan xonadon oladi, — dedi Shavkat Mirziyoyev.
Maʼlum qilinishicha, “Sputnik” dahasida yashashga yaroqsiz holga kelib qolgan 400 dan ziyod 1 va 2 qavatli yog‘och uylar o‘rnida yangi ko‘p qavatli uylar qurilib, 4,5 ming oila yangi zamonaviy xonadonlar bilan taʼminlanadi.
Munojat Valiyeva
