Endi yerosti va yerusti metro bekatlarida savdo va xizmat ko‘rsatish maydonchalari tashkil etiladi
Maʼlum qilinishicha, O‘zbekiston Respublikasi Prezidentining “Toshkent metropoliteni faoliyatini samaradorligini oshirish chora-tadbirlari to‘g‘risida”gi qarori qabul qilindi.
Qarorga asosan “Toshkent metropoliteni” faoliyatini tubdan o‘zgartirish belgilangan. Jumladan, metropolitenning boshqaruv tuzilmasini takomillashtirish, metropoliten tarmog‘ini rivojlantirish, yo‘lovchilar oqimini ko‘paytirish, zamonaviy texnologiyalarni joriy etish hisobiga metropolitenning moliyaviy-iqtisodiy samaradorligini va rentabelligini oshirish rejalashtirilgan. Bu haqda AOKAda “Toshkent metropoliteni” DUK mutasaddilari ishtirokida o‘tkazilgan brifingda maʼlum qilindi.
Qayd etilishicha, joriy yilning oxirigacha Toshkent metropoliteni uchun 5 ta, 2022 yilda 14 ta to‘rt vagonli metro poyezdlari xarid qilinadi va poyezdlarning soni 80 taga yetkaziladi. Natijada, metro poyezdlarining o‘rtacha yoshi 38 yoshdan 26 yoshga qisqaradi.
Shuningdek, 2021-yil 1-sentabrdan Chilonzor yo‘nalishi 3 minut va O‘zbekiston yo‘nalishi bo‘yicha birinchi marta 4 minutda ishlash tashkil qilinishi evaziga yo‘lovchilarni manzilga yetkazish vaqti 30 foizga qisqartirildi. Bundan tashqari, zamonaviy reklama vositalari (elektron displey) o‘rnatilishi hisobiga reklamalar soni 3-4 barobarga oshiriladi. Yer osti va yer usti metro bekatlarida savdo va xizmat ko‘rsatish maydonchalari tashkil etiladi va tadbirkorlarga elektron auksion shartlarida ijaraga beriladi.
Maʼlumot uchun endilikda yer osti va yer usti metro bekatlarida savdo va xizmat ko‘rsatish maydonchalari tashkil etiladi.
Qaror ijrosini taʼminlash bo‘yicha metropoliten boshqarmasida 3 ta yo‘nalishda Ishchi guruhlar tashkil etilishi ko‘zda tutilgan.
Eslatib o‘tamiz, avvalroq Rossiyadan O‘zbekistonga 20 ta zamonaviy metro vagonlari yuborilishi va Toshkentga yangi metro vagonlarining navbatdagi partiyasi kelishi haqida xabar berilgandi.
Shuningdek, 2022 yil 1 aprelgacha yerosti metrosi ichida ham telefonda gaplashish imkoni paydo bo‘lishi hamda Rossiyadan keltirilgan poyezdlarda eshiklar kengaytirilib, videokuzatuv kuchaytirilgani haqida xabar qilingandi.
Cho‘lponoy Ahmedova
