2022 йил 1 апрелгача ер ости метроси ичида ҳам телефонда гаплашиш имкони пайдо бўлади

 

 

Бу ҳақда “Тошкент метрополитени фаолиятининг самарадорлигини ошириш чора-тадбирлари тўғрисида”ги Президент қарори қабул қилинди.

 

Унга мувофиқ, “Тошкент метрополитени” УК “Ўзбекистон темир йўллари” АЖ таркибидан чиқарилиб, Транспорт вазирлиги тизимига ўтказилди ҳамда номи “Тошкент метрополитени” давлат унитар корхонасига ўзгартирилди.

 

Энди “Тошкент метрополитени” ДУКдан 2024 йил 1 январгача республикада ишлаб чиқарилмайдиган, шунингдек, тегишли рўйхат бўйича импорт товарларни  давлат ҳудудига олиб киришда улардан божхона тўловлари олинмайди. Бунда қўшилган қиймат солиғи ва божхона йиғимларидан ташқари тўловлар назарда тутилган.

 

Қарорга асосан, 2022 йил 1 июлгача 7 та метро бекатида (Беруний, Чорсу, Пахтакор, Олмазор, Туркистон, Қўйлиқ бозори, Чилонзор) транспорт ўтиш боғламалари йўлга қўйилиши режалаштирилган. Бундан ташқари, 2022 йил 1 октябргача Тошкент шаҳрига кириб келувчи йўловчи транспортлар учун 6 та метро бекати (Туркистон, Юнусобод, Чилонзор ва ер усти ҳалқа линиясининг 3,- 4- ва 5-бекати) атрофида автотураргоҳлар ташкил этилади.

 

2022 йил 1 январдан шу бўйича бир нечта маълумот ва хизматларни ўз ичига олувчи мобил илова ишга туширилади. Метрополитен йўналишлари ва уларнинг қурилиши бўйича маълумотлар, бекатлар, улар атрофида жойлашган объектлар ва жамоат транспорти йўналишлари ҳақида ахборот берадиган иловалар, шулар жумласидан. Электрон тўлов тизими янада оммалашади. 

 

Бундан аввал 30 августдан Тошкент метросининг барча йўналишлари соат 05:00 дан 00:00 гача ишлаши, Россиядан Ўзбекистонга 20 та замонавий метро вагонлари юборилгани ҳамда 10 та янги поезд қайси маблағ эвазига сотиб олиниши маълум бўлгани ҳақида хабар берилганди.

 

Оламгир Абдиев