Xalqaro media-хollda O‘zbek tili bayrami o‘tkazildi
Bugun Xalqaro media-хollda Kinematografiya agentligi tomonidan 21-oktyabr – O‘zbek tili bayrami kuni sharafiga hamda o‘zbek tiliga Davlat tili maqomi berilganligining 32 yilligi munosabati bilan “Qadring baland bo‘lsin, ona tilim!” mavzusida bayram tadbiri bo‘lib o‘tdi.
Unda kinoijodkorlar, mutaxassislar, OAV vakillari va yoshlar ishtirok etishdi. Tadbirda O‘zbekiston xalq artisti Tesha Mo‘minov hamda O‘zbekiston davlat sanʼat va madaniyat instituti rektori, professor Ibrohim Yo‘ldoshev o‘zbek tilini mukammal o‘rganish va rivojlantirish bo‘yicha fikrlarini aytib o‘tishdi.
Bayram tadbiri davomida o‘zbek mumtoz adabiyotining yetuk vakili Zahiriddin Muhammad Bobur haqidagi “Yo‘lbars izidan” hujjatli filmi namoyish etildi.
Mazkur kinokartina O‘zbekiston Respublikasi Prezidenti Shavkat Mirziyoyevning 2020 yil 20 may kuni Toshkent shahridagi Adiblar xiyoboniga tashrifi va kinoijodkorlar bilan uchrashuvi davomida bergan topshirig‘i ijrosini taʼminlash maqsadida yaratilgan. "Xalq yuragi" nomi ostida suratga olingan turkum filmlardan biri.
Maʼlumot uchun: senariy muallifi va postanovkachi rejissyor Bobur Sher o‘g‘li, postanovkachi operator Diyor Ismatov, postanovkachi rassom Sanʼat Kenjayev, prodyuser Xurshid Alixo‘jayev.
Eslatib o‘tamiz, davlatimiz rahbari "Agar o‘zbek tilining boyligini, chiroyini bilishni xohlasangiz, Ibrohim akaga murojaat qilish kerak", deya taʼkidlagandi.
Avvalroq Hindistonning Javaharlal Neru universitetida o‘zbek tili kurslari ochilgani, "Qadring baland bo‘lsin, ona tilim" xalqaro ko‘rik-tanlovida britaniyalik Tomas Velsford g‘olib bo‘lgani, axborot-qidiruv tizimlari uchun o‘zbek tilining dasturiy vositasi yaratilgani hamda “Avtobusga sig‘may qolgan harflar yoki biz qayerda xato qildik?" nomli maqola taqdim qilingan edi.
