"Saylov natijalarini to‘la tan olamiz". Nomzodlar Shavkat Mirziyoyevni tabrikladi
Saylov jarayonlari ortda qoldi. Mag‘lub partiya nomzodlari 80.1 foiz ovoz bilan g‘olib bo‘lgan Shavkat Mirziyoyevni tabrikladi.
Xalq demokratik partiyasidan Prezidentlikka nomzod bo‘lib, yakunda ikkinchi o‘rinni egallagan Maqsuda Vorisova Shavkat Mirziyoyevni saylovdagi g‘alaba bilan qutladi.
- Biz buni xalqimizning siyosiy irodasining amaldagi ifodasi deb bilamiz va saylov natijalarini to‘la to‘kis tan olamiz. Biz xalqimizning ushbu tanlovini xurmat qilamiz va qadrlaymiz, – dedi Maqsuda Vorisova.
Shuningdek, “Milliy tiklanish” partiyasidan Prezidentlikka nomzod sifatida ko‘rsatilgan Alisher Qodirov ham saylov yakunlari bo‘yicha tashkil etilgan brifingda Shavkat Mirziyoyevni O‘zbekiston prezidenti lavozimiga saylangani bilan tabriklagan.
- Bu galgi saylov oldingilaridan tubdan farq qilganligini takror-takror aytib kelyapmiz. Mazkur saylov men uchun, albatta, katta bir hayot maktabi bo‘ldi. Biz joylarda odamlar bilan ochiq muloqot qilib, o‘zimizning fikrlarimizni, g‘oyalarimizni tushuntirishga harakat qildik. O‘ylaymanki, bunga biz qaysidir maʼnoda erishdik, – deydi Alisher Qodirov.
Shuningdek, Ekologik partiyadan Prezidentlikka nomzod Narzullo Oblomurodov ham saylovni natijalarini xalqimiz xohish irodasi hamda tanlovi sifatida hurmat qilishini va bu natijalarni to‘lig‘icha tan olishini taʼkidlagan.
- Fursatdan foydalanib, saylovchilarning 80,1 foiz ovozi bilan O‘zbekiston Respublikasi Prezidenti yuksak lavozimiga saylangan O‘zbekiston tadbirkorlari va ishbilarmonlari harakati – Liberal-demokratik partiyasidan nomzod hurmatli Shavkat Miromonovich Mirziyoyevni o‘zim va partiyadoshlarim nomidan chin dildan tabriklayman, - dedi Narzullo Oblomurodov.
Boshqa partiya rahbarlari kabi “Adolat” SDP Siyosiy Kengashi raisi, partiyadan saylovda nomzod sifatida ishtirok etgan Bahrom Abduhalimov ham saylov jarayonlari bo‘yicha o‘z fikrlarini bildirib o‘tgan.
Partiya rahbari ushbu Prezidentlik saylovi ilk bor Saylov kodeksi asosida tashkil etilgani bilan ham ahamiyatli bo‘lgani, tenglik, ochiqlik va oshkoralik, ko‘ppartiyaviylik, muqobillik, kuchli raqobat ruhida kechgani haqida gapirgan.
