Vladimir Putin Shavkat Mirziyoyevni saylovdagi g‘alabasi bilan tabrikladi
Bugun, 25-oktabr kuni O‘zbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin telefon orqali muloqot qildi. Bu haqda Prezident matbuot xizmati xabar berdi.
Qayd etiliishicha, Rossiya Prezidenti davlatimiz rahbarini mamlakatimizda bo‘lib o‘tgan Prezident saylovida ishonchli g‘alab qozongani bilan iliq qutlab, do‘st O‘zbekiston xalqiga katta muvaffaqiyatlar, farovonlik va ravnaq tiladi.
Ikki tomonlama strategik sheriklik va ittifoqchilik munosabatlarini yana-da rivojlantirishning dolzarb masalalari muhokama qilindi. Oliy darajadagi uchrashuvlar rejasi ko‘rib chiqildi.
Taʼkidlanishicha, savdo-iqtisodiy va investitsiyaviy sohalardagi amaliy hamkorlikni kengaytirish, shu jumladan qo‘shma Hukumatlararo komissiyaning bo‘lajak yig‘ilishi davomida istiqbolli kooperatsiya loyihalari va dasturlarini tayyorlash masalalariga alohida eʼtibor qaratildi.
Eslatib o‘tamiz, avvalroq MSK prezident saylovlarining dastlabki natijalarini eʼlon qilgani haqida xabar berilgandi.
