Muqaddam sudlangan “xonanda” va uning ikki sherigi yer olib beraman deb 300 ming AQSH dollar talab qildi
Firibgarlar Dehqonobod tumani o‘rmon xo‘jaligi hududidan 1000 gektar yer maydoni ajratilishida yordam berishlarini aytib, evaziga pul talab qilgan.
Bosh prokuratura huzuridagi iqtisodiy jinoyatlarga qarshi kurashish Departamentning Toshkent shahar boshqarmasi bilan hamkorlikda tezkor tadbir o‘tkazildi. Unda Davlat xavfsizlik xizmati xodimlari firibgarlik bilan bog‘liq noqonuniy holatga chek qo‘ydi.
Maʼlum qilinishicha, xorijdan avtomashinalar olib kelib, sotish bilan shug‘ullanuvchi Toshkent shahrida yashovchi 1981-yilda tug‘ilgan shaxs Toshkent viloyatining Yuqorichirchiq tumanida joylashgan fermer xo‘jalik rahbari bilan kelishgan holda, o‘zganing ishonchiga kiradi. Ushbu xo‘jalikning 16,5 gektar sug‘oriladigan yerini uning nomiga rasmiylashtirib berish evaziga 600 ming AQSH dollari talab qilgan. Ular bu ishga 1987 yilda tug‘ilgan shaxsni ham jalb etgan.
O‘tkazilgan tezkor tadbir davomida firibgarlar so‘ralgan pulni olgan vaqtda ashyoviy dalillar bilan qo'lga olindi.
Qayd etilishicha, Toshkent shahrida yashovchi, 1963 va 1975-yillarda tug‘ilgan ikki nafar fuqaro tadbirkorlik bilan shug‘ullanmoqchi bo‘lgan shaxsga “kovrak” o‘simligi yetishtirishi uchun Qashqadaryo viloyatining Dehqonobod tumani o‘rmon xo‘jaligi hududidan 1000 gektar yer maydoni ajratilishida yordam berishlarini aytgan. Evaziga esa 300 ming AQSH dollari talab qilgani maʼlum bo‘ldi.
Maʼlumot uchun: Kovrak yer yuzida 170 dan ziyod turi mavjud. O‘rta Osiyoda 110 dan ortiq, yurtimizda esa 50 turi uchraydi. Kovrak yelimi tabobatda baʼzi asab kasalliklarida talvasaga qarshi vosita tariqasida, shuningdek, gijja haydaydigan dori sifatida qadimdan ishlatib kelingan. Bronxial astma, sariq kasalligi, ko‘k yo‘tal, sil, zaxmda foydalaniladi.
Tergovoldi surishtiruv davomida ular ushbu noqonuniy ishni o‘zini go‘yoki O‘rmon xo‘jaligi davlat qo‘mitasi inspektori deb tanishtirgan, 1988-yil Qarshi shahrida tug‘ilgan, hozirda Toshkent shahrida istiqomat qilib, aslida, xonandalik bilan shug‘ullanuvchi, muqaddam sudlangan shaxs bilan 80 ming AQSH dollari evaziga hal qilishga o‘zaro kelishib olganliklari aniqlandi. Tezkor tadbirda Toshkent shahrida dastlabki 24 ming AQSH dollarini olgan vaqtida u ham ushlandi.
Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Eslatib o‘tamiz, avvalroq zaxiradagi yer maydonini sotmoqchi bo‘lgan firibgar ushlangani, Surxondaryoda 13 ming dollar evaziga issiqxona qurib berishni vaʼda qilgan shaxslarga jinoyat ishi qo‘zg‘atilgani, Bo‘stonliq tumanida 5 gektar yerni 150 ming AQSH dollarga olib berishni vaʼda qilgan shaxs qo‘lga olingani hamda DXX tomonidan noqonuniy yer sotish holatlarining oldi olingani haqida xabar berilgandi.
