Захирадаги ер майдонини сотмоқчи бўлган фирибгар ушланди
Навоий вилоятида захирадаги ер майдонини сотмоқчи бўлган фирибгар қўлга олинди. Бу ҳақда Прокуратура Департаменти хабар берди.
Унда айтилишича, ўтказилган тезкор тадбирда фуқаро Л.Қ. таниши Ш.нинг ишончига кириб, “ўзига тегишли бўлган” 40 сотих ер майдонини 75 миллион сўмга сотишга келишади.
Аслида, бу ер Навбаҳор тумани ҳокимлиги захирасида таркибида бўлиб, фуқаро Л.Қ. фирибгарлик йўли билан фуқарони “чув” туширмоқчи бўлган.
Қаллоблик қилишга уринаётган фуқаро Л.Қ. 1 700 АҚШ доллари ва 57 миллион сўм олаётган вақтда ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.
Аввалроқ Жарқўрғон туманида захирадаги ерни сотмоқчи бўлган фирибгар ушлангани, қонунни бузган валютафурушнинг “бозори” ўхшамагани ҳамда уй олиб беришни ваъда қилган фирибгар қўлга тушгани ҳақида хабар берилганди.
Оламгир Абдиев
