Parkent tumanida xonadonda sherlar boqilayotgani aniqlandi (video)
Xonadon egasining maʼlum qilishicha, sherlarning barcha hujjati joyida. Biroq...
Toshkent viloyati Parkent tumanidagi xonadonda sherlar boqilayotgani haqida xabar tarqaldi. Bu haqda “ekologuz” kanali xabar berdi.
Maʼlum qilinishicha, “Mehr va oqibat” hayvonlarni himoya qilish nodavlat notijorat tashkiloti hamda Parkent tuman Ekologiya boshqarmasi vakillari ushbu xonadonga borgan.
Aniqlanishicha, bu yerda haqiqatdan ham ikkita sher (erkak va urg‘ochisi) va ularning bolasi tor, qorong‘i, yerto‘lasimon joyda saqlanmoqda. Bolasining bir ko‘zi esa parda bilan qoplangan bo‘lib, ota-onasidan ajratib olingan.
Xonadon egasining maʼlum qilishicha, sherlarning barcha hujjati joyida. Ularni Andijon hayvonot bog‘idan sotib olgan va ayni paytda Krasnogorskda xususiy hayvonot bog‘i ochishga harakat qilmoqda. Ammo maʼlumotlarga ko‘ra, hali bog‘ga yer ajratilmagan. Sherlar 2 yildan buyon qorong‘i joyda saqlab kelinmoqda.
Eslatib o‘tamiz, Zamon.uz saytida uyida sher bolalarini boqib, katta biznes qilayotgan yigit haqida videolavha berilgandi.
Maʼlumot uchun:
Hayvonlar huquqlari Yevropa hayvonlarni himoya qilish konvensiyasida mustahkamlab qo‘yilgan. Unga ko‘ra:
1. Hech kim hayvonga keraksiz og‘riq, azob yoki zarar yetkazishga haqli emas.
2. Uy hayvonini qarovsiz tashlab ketishga yo‘l qo‘yilmaydi.
Hayvonlar salomatligiga alohida eʼtibor qaratish zarur. Hatto uysiz hayvonlar ko‘payishi muammoli muhitni yaratsa ham, konvensiyaga binoan, ularni ruhiy stressga olib kelmasdan qo‘lga olish kerak. Faqat veterinar yoki boshqa malakali odamlar zarurat tug‘ilganda hayvonni bo‘g‘ib o‘ldirishi, cho‘ktirishi yoki boshqa shafqatsiz choralar ko‘rmasdan evtanaziya (o‘ldirish) qilishi mumkin.
Avvalroq Jizzaxda it ovlov brigadasi 7 ta itni otib tashlagani hamda mushukni kaltaklagan bolaning onasi jarimaga tortilishi mumkinligi haqida xabar berilgandi.
