Ижтимоий тармоқларда вояга етмаган боланинг мушукка нисбатан ғайриинсоний муносабатда бўлгани тасвирланган видеолавҳа кенг тарқалди. Тошкент шаҳар ички ишлар бошқармаси ушбу ҳолатга изоҳ берди.
Аниқланишича, воқеа Тошкент шаҳар Чилонзор туманида юз берган. Аёл ва унинг ўғли шахси аниқлангач туман ИИБда Тошкент шаҳар ИИБ ходимлари, вояга етмаганлар билан ишлаш бўйича инспектор, профилактика инспектори ва маҳалла раиси иштирокида улар билан профилактик суҳбат ўтказилган. Боланинг онасига нисбатан 47-модда (Болаларни тарбиялаш ва ўқитиш вазифаларини бажармаслик) бўйича маъмурий протокол тузилган.
Қайд этилишича, вилоят ҳокимлиги вояга етмаганлар ишлари бўйича идоралараро комиссияга ҳолат бўйича маълумот юборилган.
Маълумот учун, ҳайвонларга нисбатан шафқатсиз муносабатда бўлиш, яъни ғаразли ёки бошқа паст ниятларда уларни қийноққа солиш ёхуд уларга азоб бериш уларнинг ўлимига ёки майиб бўлишига олиб келса, шундай ҳаракатлар учун маъмурий жазо қўлланилганидан кейин содир этилган бўлса – 12 млн 250 минг сўм жаримадан 6 ойгача озодликдан маҳрум қилишгача жазо чоралари қўлланилиши белгиланган.
Эслатиб ўтамиз, бундан аввалроқ Жиззахда ит овлов бригадаси 7 та уйсиз итни отиб ташлагани, Япониядаги темир йўл станцияси яқинида уч ўлчамли улкан мушук пайдо бўлгани ҳамда Ўзбекистонда қанча ҳайвон паспорт олгани ҳақида хабар берилган эди.
Акрам Хамрақулов