“O‘zbekneftgaz” tarixda ilk bora o‘zining yevroobligatsiyalarini London birjasida joylashtirdi
Obligatsiyalar Buyuk Britaniya, AQSH, Germaniya, Yevropa hamda Osiyo mamlakatlaridan qatnashgan 120 dan ortiq investorlar orasida taqsimlandi.
Prezidentning 2021-yil 3-fevraldagi farmoni va Vazirlar Mahkamasining 2021-yil 3-noyabrdagi qaroriga muvofiq amalga oshirilayotgan transformatsiya jarayonlarini davom ettirish hamda moliyalashtirish manbalarini diversifikatsiya qilish maqsadida, Moliya vazirligi ko‘magida “O‘zbekneftgaz” AJ o‘z tarixida ilk bor London fond birjasida RegS/144A formatida 7 yil muddatlik 700,0 million AQSH dollari miqdoridagi yevroobligatsiyalarini muvaffaqiyatli joylashtirdi.
Bu o‘z navbatida jamiyatning transformatsiya va dunyodagi eng yaxshi biznes amaliyotlarni joriy etish bo‘yicha tizimli ishlarning natijasi hisoblanadi, jumladan:
-
Ernst&Young (Buyuk Britaniya) xalqaro auditorlik kompaniyasi tomonidan jamiyatning 2017—2020 yillar va 2021-yilning 1- yarim yilligi uchun jamiyatning MHXSga asosan konsolidatsiyalashgan moliyaviy hisobotlari auditi o‘tkazildi;
-
Fitch Ratings va S&P xalqaro reyting agentliklari tomonidan (BB– /barqaror) darajasidagi korporativ reyting va emissiyasiga reyting berildi;
-
obligatsiyalarni chiqarish uchun CITI Group, JP Morgan (AQSH), Mitsubishi UFG (Yaponiya) va “Gazprombank” AJ (RF) kabi tashkilotchi banklar jalb qilindi;
-
barcha turdagi yuridik ekspertizalar (auditorlik, moliyaviy, boshqaruv) o‘tkazildi.
Yuqoridagi tadbirlarni amalga oshirish natijasida, xalqaro obligatsiyalarni chiqarish doirasida joriy yilning 5-8 noyabr kunlari o‘tkazilgan roadshow davomida potensial investorlarga jamiyat faoliyati haqida taqdimot o‘tkazildi.
Shu bilan birga, AQSH, Yevropa, Rossiya Federatsiyasi va Osiyo mamlakatlaridan 35 dan ortiq institutsional investorlar bilan telekonferensiya (Global Investor Call) va yirik xalqaro 28 ta investorlar bilan individual uchrashuvlar o‘tkazishga erishildi.
Olib borilgan marketing o‘rganishlar natijasida 9-noyabr holatiga tashkilotchi banklar (Bank GPB International S.A., Citigroup Global Markets Limited, J.P. Morgan Securities plc. va MUFG Securities EMEA plc) tomonidan jamiyatning yevroobligatsiyalarining boshlang‘ich foiz stavkasi 5,00 foiz miqdorida belgilandi.
Natijada jami 1,9 milliard AQSH dollari (tashkilotchi banklar buyurtmanomalarisiz – 1,7 milliard AQSH dolllari) miqdoridagi buyurtmanomalar kelib tushdi. Ishtirokchilarning sifat va miqdori tahlili natijasiga ko‘ra, yakuniy foiz stavkasi 4,75 foizgacha tushirildi.
“O‘zbekneftgaz” AJ matbuot xizmati
