Turkiyada ikki qidiruvdagi shaxs ushlandi: biri 9 yildan beri qochib yurgan
Ikki fuqaro belgilangan tartibda O‘zbekistonning vakolatli organlariga topshirildi.
Turkiyaning Istanbul shahrida O‘zbekiston tomonidan xalqaro qidiruvga berilgan ikki nafar fuqaro qo‘lga olindi. Ulardan biri 2017 yildan buyon bosqinchilikda ayblanib qidiruvda bo‘lgan.
Huquqni muhofaza qiluvchi organlar hamkorligida aniqlangan F.F.N. O‘zbekiston Jinoyat kodeksining 164-moddasi 3-qismi bilan ayblanib, 2017 yildan beri qidiruvda bo‘lgan. Shu tariqa u qariyb to‘qqiz yil davomida huquqni muhofaza qiluvchi organlardan yashirinib yurgan.
Shuningdek, Jinoyat kodeksining 168-moddasi 3-qismi — firibgarlik bilan bog‘liq jinoyatni sodir etganlikda ayblanib, xalqaro qidiruvga berilgan A.M.A. ham Istanbulda ushlandi.
Ikki fuqaro belgilangan tartibda O‘zbekistonning vakolatli organlariga topshirildi. Hozirda ularga nisbatan tegishli tergov va boshqa protsessual harakatlar olib borilmoqda.
O‘zbekiston va Turkiyaning huquqni muhofaza qiluvchi organlari xalqaro qidiruvdagi shaxslarni aniqlash va jinoyatchilikka qarshi kurashish bo‘yicha hamkorlikni davom ettirmoqda.
