Paxta terimi puli vaqtida to‘lanmagan: terimchilarga qariyb 9 mlrd undirib berildi
Davlat mehnat inspeksiyasi hududlarda monitoring o‘tkazdi.
Paxta yig‘im-terimi mavsumida terimchilarga o‘z vaqtida to‘lanmagan mablag‘ undirib berildi. Bu haqda Davlat mehnat inspeksiyasi ma’lum qildi.
Inspeksiya 2–4-oktyabr kunlari Qoraqalpog‘iston Respublikasi, Qashqadaryo, Namangan, Surxondaryo, Farg‘ona va Xorazm viloyatlarida monitoring o‘tkazgan.
Tekshiruvlar davomida terimchilarga mehnat haqi o‘z vaqtida to‘lanmagani aniqlangan va jami 8 milliard 833 million so‘m terim puli undirib berilgan.
Davlat mehnat inspeksiyasi paxta yig‘im-terimi mavsumida mehnat huquqlariga rioya etilishi, ish haqining o‘z vaqtida to‘lanishi hamda majburiy mehnatga yo‘l qo‘yilmasligi yuzasidan monitoringlarni davom ettiradi.
