O‘zbek kinoijodkorlari Turkiyada
Hamkorlik yana mustahkamlash yuzasidan teleseriallar ishlab chiqarish bo‘yicha ikki davlat o‘rtasida memorandumlar imzolanishi kutilmoqda.
Turkiyada bo‘lib o‘tayotgan “Korkut ata” xalqaro kinofestivalida taniqli kinoijodkorlardan iborat o‘zbek delegatsiyasi ham ishtirok etmoqda. Festivalda turkiyaliklar o‘zbek kinoijodkorlarini katta tantana bilan qarshi olishdi.
Festival doirasida O‘zbekiston Kinematografiya agentligi buyurtmasiga binoan suratga olingan rejissyor Ali Hamrayevning “Xalq jasorati” va Jahongir Ahmedovning “Ilhaq” filmlari premyerasi bo‘lib o‘tdi. Shuningdek, Kinematografiya agentligi Bosh direktori Firdavs Abduxoliqov tomonidan Turkiya Respublikasi Madaniyat va turizm vaziri Mehmet Ersoyga “O‘zbekiston madaniy merosi jahon to‘plamlarida” kitob albomi taqdim etildi.
Kinofestivalda o‘zbekistonlik kinoijodkorlar tomonidan “O‘zbek kino kunlari” ijodiy kechasi hamda Rashid Malikov rejissyorligida yaratilgan “Tutqunlik” filmining premyerasi bo‘lib o‘tishi ham rejalashtirilgan.
O‘zbekiston va Turkiya kinematografistlari hamkorligini yana mustahkamlash yuzasidan teleseriallar ishlab chiqarish bo‘yicha memorandumlar imzolanishi kutilmoqda.
"Korkut ata” xalqaro kinofestivali 12 noyabrgacha davom etadi.
Avvalroq “Ipak yo‘li durdonasi” XIII Toshkent xalqaro kinofestivaliga turkiyalik bir guruh kinoijodkorlar tashrif buyurishgani hamda Turk va hind kinoijodkorlari bilan ijodiy kecha tashkil etilgani haqida xabar berilgandi.
Munojat Valiyeva
