Mehnat migratsiyasiga ketayotgan fuqarolarga kompensatsiya to‘lanadi
“Xorijga tashkillashtirilgan mehnat migratsiyasiga ketayotgan fuqarolarni rag‘batlantirish bo‘yicha qo‘shimcha chora-tadbirlar to‘g‘risida”gi Prezident qarori qabul qilindi.
Bugungi kunda mehnat migrantlarining muammosi kelajak nuqtai nazaridan o‘z yechimini kutayotgan eng dolazrb masalalaridan biri bo‘lib qaralmoqda. Bunda mehnat migratsiyasi O‘zbekistonda ish yo‘q, maoshlar kam degan so‘zlar bilan izohlanmoqda.
Qarorga ko‘ra, 2021-yil 1-sentabrdan boshlab 2022-yil 1-sentabrga qadar “labor-migration” dasturiy majmuasida ro‘yxatdan o‘tgan, kasb-hunar yoki xorijiy tillarga o‘qigan va tashkillashtirilgan mehnat migratsiyasiga ketayotgan fuqarolarga:
— xorijiy tillar yoki kasb bo‘yicha malaka imtihonlarini topshirish bilan bog‘liq xarajatlarini qoplash uchun, basharti ular muvaffaqiyatli topshirilganda – BHMning 3 baravarigacha miqdorda (735 ming so‘m);
— yo‘l chiptasini xarid qilish bilan bog‘liq xarajatlarini qoplash uchun – BHMning 2 baravarigacha miqdorda (490 ming so‘m);
— rivojlangan davlatlarda mehnat faoliyatini amalga oshirishga “ishchi viza”ni rasmiylashtirish bilan bog‘liq xarajatlarini qoplash uchun – BHMning 5 baravarigacha miqdorda (1 mln 225 ming so‘mgacha) kompensatsiya to‘lanadi.
Bunda:
— mehnat migratsiyasiga ketayotgan fuqaro “labor-migration” dasturiy majmuasi orqali masofaviy tarzda yoki bevosita Tashqi mehnat migratsiyasi agentligi va Bandlikka ko‘maklashish markazlariga ariza bilan murojaat qiladi;
— ariza Tashqi mehnat migratsiyasi agentligi tomonidan 1 ish kuni ichida ko‘rib chiqiladi.
Eslatib o‘tamiz, Rossiya O‘zbekistonning 150 ming fuqarosiga mamlakatga kirishga qo‘yilgan taqiqni olib tashlagandi.
Avvalroq xorijdagi mehnat migrantlariga qanday moddiy yordam ko‘rsatilishi, o‘n ming O‘zbekistonlik yaqin vaqt davomida Rossiyaga ishga jalb qilinishi, Rossiyada migratsiya to‘g‘risida yagona hujjat joriy etilishi hamda Tashqi Mehnat migratsiyasi orqali ishlashga ketgan fuqarolarning noroziligi haqida xabar berilgandi.
