O‘z o‘g‘lining qotiliga aylangan fuqaro 8 yilga qamaldi
Fojia sodir bo‘lgan kun marhum yigitning tug‘ilgan kuni bo‘lgan.
Samarqand viloyatida yashovchi 1970-yilda tug‘ilgan fuqaro o‘z o‘g‘lining qotiliga aylandi. Ota spirtli ichimlik taʼsirida bu ishga qo‘l urgani aytilmoqda.
O‘sha kuni mast ota va o‘g‘li o‘rtasida janjal bo‘lgan. O‘g‘li otasining spirtli ichimlik isteʼmol qilganidan norozi bo‘lgan. Sudlanuvchining so‘zlariga ko‘ra, yuzaga kelgan janjal oqibatida o‘g‘li unga qo‘l ko‘targan va yengil tan jarohatlar yetkazgan. U esa o‘g‘lini ogohlantirish maqsadida pichoq o‘qtalgan. Ammo o‘g‘li pichoqni ko‘rsa-da, yana hujum qilishda davom etgan. Shu vaqt sudlanuvchi jahl ustida farzandiga qarata pichoq sanchigan. Qo‘shnilar yordamida yigit og‘ir ahvolda shifoxonaga olib borilgan.
Ko‘rsatilgan tibbiy yordamga qaramay, ko‘p qon yo‘qotish natijasida yigit shifoxonada jon bergan. Ota esa qo‘shnisining do‘kon yoniga borib, yana bir piyola spirtli ichimlik ichayotgan vaqtida qo‘lga olingan.
Bu vaqt marhum yigitning onasi Turkiya shahriga o‘g‘lini uylantirish uchun pul ishlab topish maqsadida ketgan bo‘lgan. Uning so‘zlariga qaraganda, turmush o‘rtog‘i doimiy spirtli ichimlik isteʼmol qilib kelgan. Uyga mast holda kelib, janjal ko‘tarib, oila aʼzolarini kaltaklab kelgan.
Jinoyat ishlari bo‘yicha Samarqand tuman sudida qo‘lini o‘z o‘g‘lining qoniga belagan ota sud qilindi. Jinoyat kodeksinning 104-moddasi 3-qismi "d" bandi bilan aybli deb topilib, 8 yil muddatga ozodlikdan mahrum qilindi.
Avvalroq Qibrayda bir uydan besh kishining jasadi topilgani, samarqandlik kuyov xotini va qaynonasini urib, o‘ldirib qo‘ygani hamda Qashqadaryoda erkak o‘z o‘g‘lining qotiliga aylangani haqida xabar berilgandi.
Муножат Валиева
