O‘zbekistonda koronavirusga qarshi emlanmaganlarga qatʼiy chora ko‘rish boshlandi
Bu borada Toshkent viloyati Sanitariya-epidemiologik osoyishtalik va jamoat salomatligi boshqarmasining hududiy bo‘limlari tomonidan tekshiruv o‘tkazildi.
Xususan, xorijiy davlatlarda laboratoriya tekshiruvlaridan o‘tgan va yuqori baholangan vaksinalarning olib kelinishi, karantin vaqtida dori-darmon vositalari bilan aholining yetarlicha taʼminlanishi respublikada aholining salomatligi har doim eʼtiborda ekanligining isbotidir.
Qayd etilishicha, hududlarida tashkil etilgan emlash punktlari va emlash mobil birgadalari tomonidan dastlab aholining 65 yoshdan yuqori va keyinchalik 18 yoshdan kattalarni bepul emlash ishlari tashkil etildi.
Vaksina – yagona chora bo‘lganligi sababli mamlakatimizda aholini emlash bo‘yicha bir qancha qonun-qoidalar ishlab chiqildi. Bu kabi qonunlarga amal qilmaslik holatlari ustidan qattiq nazorat tadbirlari olib borildi.
Ammo shunga qaramasdan, Toshkent viloyati Sanitariya-epidemiologik osoyishtalik va jamoat salomatligi boshqarmasi va hududiy bo‘limlari tomonidan viloyatda 1863 ta tekshirish tadbirlari tashkil etilgan vaqtda 6526 nafar fuqaro vaksina olmaganligi aniqlandi.
Ulardan 1402 nafari tadbirkorlik subyektlari va 5035 nafari esa byudjet tashkilotlarida mehnat faoliyatini olib borayotgan fuqarolardir.
Bu kabi fuqarolarga qonunchilikda belgilangan talablarga amal qilmaganligi uchun qonuniy choralar ko‘rildi. Bunday holatlar Toshkent viloyatida 3608 tani tashkil etadi. Bular orasida 3229 nafar xodim vaqtincha ishdan chetlashtirilgan. 374 nafari tegishli tartibda jarimaga tortilgan bo‘lsa, 5 tasining faoliyati to‘xtatilgan obyektlardir.
Eslatib o‘tamiz, avvalroq vaksina olganlar ham o‘zlarini himoyalashlari shartligi hamda Oliy Majlis Qonunchilik palatasi spikeri quyi palata deputatlari orasida vaksina olmaganlar sonini ochiqlagandi.
Cho‘lponoy Ahmedova
